Në një lidhje direkte me “News24”, pedagogia shqiptare në Itali, Luljeta Paparisto, tregoi tmerrin në spitalet italiane, ku të prekurit dhe viktimat po shtohen në shifra të frikshme dita ditës.
Paparisto bëri thirrje për kujdes, duke pohuar se të infektuarit nuk janë vetëm moshat e thyera, por edhe plot të rinj.
Pedagogia rrëfen se të sëmurët kalojnë momente shumë të vështira, pasi kalojnë 18 orë përmbys me ventilacionet dhe s’kanë asnjë kontakt me familjarët.
Ajo gjithashtu tregoi se shumë familjarë pyesin për fjalët e fundit që ka thënë pacienti.
“Popullsia italiane është e vjetër dhe vdesin më shumë, por nuk përjashtohet absolutisht vdekja e atyre që janë shumë të rinj dhe shumë të fortë. Në këtë gjendje as mjeku i familjes nuk vjen në shtëpi. I sëmuri që kalon momente shumë të vështira, sepse duhet të rrijë në pozicionin përmbys 18 orë me ventilacionet dhe vuan jashtëzakonisht shumë, dhe në fund nuk ka asnjë kontakt me familjarët, por vetëm me doktorin ose infermierët. Shumë familjarë pyesin edhe për fjalën e fundit që mund të ketë thënë pacienti. Tani nuk ka më as vende në varreza, trupat e pajetë merren me makina ushtarake dhe çohen edhe në qytete të tjera.”- tregon ajo.
E pyetur nëse ka dëshmi të njerëzve që ia kanë dalë të mposhtin virusin, Paparisto shprehet:
“Po, sigurisht. Ata tregojnë që kur sëmuren janë momente shumë, shumë të vështira për t’i kaluar, që jo gjithkush mund t’ia dalë. Sëmundja shkatërron mushëriktë, veshkat, gjithë sistemin, edhe zemrën. Ata që kanë edhe sëmundje të tjera nuk ia dalin dot, të tjerët duhet të luftojnë, pasi është shumë vështirë të kalohet. Përballë gjithë kësaj katrahure që po ndodh nuk e quaj sakrificë të rrish në shtëpi. Është gjëja elementare dhe më e thjeshtë që mund të bëjë një njeriu për të shpëtuar veten dhe familjarët e tij. Kush nuk e bën këtë është kriminel. Nuk është e vërtetë që virusi shpërndahet vetëm me kollë, por edhe vetëm duke folur me njëri-tjetrin.”
Burimi: Balkanweb
