Pas raportimeve të “iconstyle.al” se në Spitalin Amerikan prej thuajse një jave kryhen teste për identifikimin e të prekurve me COVID-19 dhe vetë drejtori i spitalit Klodjan Allajbeu u shpreh në emisionin “Opinion” se ishte në pritje të reagentëve për të nisur testimet me një pajisje që bën 1.428 të tilla në ditë (lexo këtu), ka ardhur një reagim nga Agjencia Kombëtare e Barnave dhe Pajisjeve Mjekësore.
Në një deklaratë të bërë publike ditën e sotme, AKBPM ka bërë të ditur se përveç strukturave shtetërore, asnjë subjekt tjetër privat nuk është i certifikuar për të kryer testimin e COVID-19.
Kjo deklaratë vjen pas asaj të dr. Silva Bino, shefe e departamentit të sëmundjeve infektive në ISHP, e cila tha se vetëm laboratori i ISHP ishte i certifikuar për kryerjen e kësaj analize dhe se po punohej për dy të tjerë në spitalin Infektiv në QSUT dhe spitalin “Shefqet Ndroqi”.
Deklarata e AKBPM:
Duke u bazuar në Ligjin Nr. 89/2014 “Për Pajisjet Mjekësore”; VKM Nr.89 datë 09.03.2016 “Për Kërkesat Thelbësore, Markimin CE dhe Vlerësimin e Konformitetit të Pajisje Mjekësore Diagnostikuese In Vitro” si dhe në Urdhrin Nr. 734 datë 18.10.2018 “Për disa ndryshime në Urdhërin nr. 360 datë 22.08.2016 të Ministrit të Shëndetësisë dhe Mbrojtjes Sociale, “Mbi Procedurat dhe Rregullat për Regjistrimin e Pajisjeve Mjekësore Ndryshimet dhe Anulimin e Regjistrimit të tyre, Dokumentacionin e Nevojshëm dhe Kostot Përkatëse” i ndryshuar me Urdhër Nr. 734 datë 18.10.2018, Agjencia Kombëtare e Barnave dhe Pajisjeve Mjekësore deri më tani nuk ka lëshuar asnjë Certifikatë regjistrimi për Reagentët In Vitro për subjektet private, për diagnostikimin e COVID-19.
Megjithatë, ndonëse nuk ka një certifikim nga autoritetet, Spitali Amerikan vijon të kryejë testin për matjen e nivelit të Proteinës C Reaktive, që bazohet në nivelin e inflamacionit në trup e që nuk rezulton të jetë efektiv në detektimin e koronavirusit. Për këtë testim, pacientët paguajnë në këtë spital një shumë prej 26.000 lekësh.
Këto pazare me shumë gjasa do të vijojnë edhe më tej, duke qenë se vetë drejtori Allajbeu konfirmoi se me të marrë reagentët, në Spitalin Amerikan do të nisë testimi me pajisjen e kompanisë “Roche” që kryen 1.428 teste në ditë, kundrejt një shume prej 150-300 eurosh, ndërkohë që ky shërbim duhet të ofrohet nga shëndetësia shqiptare falas për të gjithë qytetarët.
