Festivali ndërkombëtar i filmit “Dea Open Air” ngriti siparin e edicionit të shtatë mbrëmjen e djeshme për të vijuar deri në 16 tetor në kryeqytet. Kjo është hera e dytë që festivali i filmit zhvillohet në Tiranë, sepse 5 edicionet e mëparshme janë organizuar në Sarandë e Gjirokastër.
Këtë vit janë përfshirë në konkurrim 68 filma artistikë me metrazh të gjatë dhe të shkurtër, si dhe dokumentar. Kosova çeli ditën e djeshme festivalin me filmin “Cirku Fluturues”, që është vlerësuar edhe disa çmime ndërkombëtare.
Filmi me regji të Fatos Berishës ka në qendër të tij vështirësitë me të cilat është hasur teatri në Kosovë gjatë kohës së luftës, për shkak të masave serbe mbi institucionet e kulturës. Regjisori ka ngritur shqetësimin e tij se arti në trojet shqiptare është pothuajse në të njëjtën gjendje si para viteve ‘90, sepse kultura nuk ka vëmendjen e shtetit.
“Ngjarja e këtij filmi ndodh në vitet ‘90, por disa gjëra s’kanë ndryshuar. Arti edhe kultura, teatri dhe filmi, s’janë në gjendjen më të mirë. Kemi ecur si shoqëri në Kosovë dhe në Shqipëri, por vëmendja e shteteve tona nuk është në nivel të duhur për kulturën. Politikanët tanë krenohen me ne kur ne bëjmë suksese ndërkombëtare. Por vetëm kaq!”, është shprehur Berisha.
Shqipëria nuk merr pjesë në festival!
“Dea Open Air” ka bërë bashkë projekte artistike nga gjithë bota, duke përfshirë Gjermaninë, Rusinë, Italinë, Bjellorusinë etj, por vendi ynë që është edhe organizator, nuk merr pjesë në të këtë vit. Në fakt kanë qenë të pakta rastet kur Shqipëria ka konkurruar në këtë festival dhe drejtori i tij ka treguar arsyen pse ndodh kjo gjë.
Edmond Topi është shprehur se vendi ynë ka synuar gjithmonë të arrijë në Oscar dhe festivale ndërkombëtare, por nuk ja ka dalë kurrë mbanë. Ai e ka cilësuar si diçka tepër qesharake që artistët shqiptarë nuk preferojnë të tilla festivale, por kërkojnë gjithmonë të dalin jashtë e të mos fitojnë asgjë.
“Shqipëria punon për Oscar dhe në përgjithësi ne kemi një tendencë që shkojmë në festivale të jashtme. Kinemaja shqiptare nuk është e orientuar nga Shqipëria, nga audienca shqiptare, festivalet shqiptare, shfaqjet në premierat shqiptare. Ndryshe nga e gjithë bota është e orientuar vetëm nga festivalet, gjë që unë e quaj pothuajse qesharake”, ka thënë drejtuesi i “Dea open Air” për “Wake Up”.
Ai ka shtuar se industria e filmit është inekzistente në Shqipëri dhe nuk kuptohet përse, përderisa sot është shumë më e lehtë të prodhosh një film krahasuar me disa vite më parë kur nuk kishte as mjete.
