Zgjedhja e kryeparlamentarit shqiptar Talat Xhaferi me votat e shumicës së re parlamentare në Maqedoni, është shoqëruar me një sherr të dhunshëm në ambientet jashtë dhe brenda Kuvendit.
Udhëheqësi i LSDM-së Zoran Zaev është parë i gjakosur, por i plagosur është edhe deputeti shqiptar Zijadin Sela, për të cilin, raportime të pakonfirmuara thonë se ndodhet në gjendje të rëndë, ndërkohë që të gjithë deputetët janë mbledhur në pjesën e sipërme në sallën e konferencave, për t’i shpëtuar përplasjeve të mundshme me protestuesit nacionalistë të VMRO-DPMNE-së. Të dhunuar kanë mbetur edhe shumë gazetarë, ndërsa numri i përgjithshëm i të plagosurve arrin në 102.
Ngjarja
Gjithçka nisi të enjten pasdite, kur deputetët e shumicës së re parlamentare, “Lidhjes Social Demokrate të Maqedonisë”, “Bashkimi Demokratik për Integrim” dhe “Aleanca Shqiptare”, zgjodhën kryetar të Kuvendit, Telat Xhaferrin. Kjo solli kundërshtimin e deputetëve të VMRO-DPMNE-së, që sidoqoftë ishte verbal, raporton “Top Channel”. Por, nuk ishte i njëjtë reagimi i qindra protestuesve që gjendeshin jashtë Parlamentit, të cilët arritën të depërtonin brenda godinës dhe të merrnin kontrollin e saj, duke ushtruar dhunë mbi deputetë dhe gazetarë.
Fakti i zgjedhjes së një shqiptari në krye të Kuvendit të Maqedonisë duket se i ka rënduar më shumë se vetë procedura e zgjedhjes nacionalistëve maqedonas, që reaguan dhunshëm duke lënduar fizikisht mes të tjerëve edhe liderin e socialdemokratëve, Zoran Zaev dhe atë të “Lëvizjes për Reforma” PDSH, Zijadin Sela. Në total, 15 deputetë mbetën të lënduar gjatë dhunës së cilës nuk i shpëtuan as agjentët e policisë.
Të gjithë liderët politikë në Maqedoni bënë thirrje për qetësi pas dhunës dhe për këtë arsye, Presidenti i vendit Gjorgje Ivanov ka thirrur në një takim emergjence të gjithë krerët e politikës të premten për të diskutuar situatën e krijuar. Edhe përfaqësuesit ndërkombëtarë, brenda e jashtë Maqedonisë kërkuan rend dhe stabilitet, ndërsa pranuan gjerësisht zgjedhjen e Talat Xhaferrit në krye të Kuvendit.
Por, zor se telashet e Maqedonisë kanë mbaruar me kaq, pasi një pjesë e konsiderueshme e politikës dhe popullsisë nuk pranojnë kurrsesi që vendi të qeveriset pas marrëveshjes së LSDM me partitë shqiptare. Partia VMRO-DPMNE dhe Presidenti i dalë prej saj, Gjorgje Ivanov kërkuan ndalimin e dhunës, por nuk kanë ndërruar qëndrim përsa i takon situatës politike në vend, diçka që paralajmëron kriza të ardhshme.
