Një konflikt i dhunshëm është regjistruar pak më parë në zonën e njohur si lagjja “Pavarësia” në Vlorë, ku një përplasje fizike mes disa personave ka përfunduar me pasoja tragjike.
Sipas informacioneve paraprake, në sherr janë përfshirë të paktën tre persona, ndërsa situata ka degraduar në dhunë fizike. Si pasojë e goditjeve të marra, 63-vjeçari Ismail Aliaj është dërguar me urgjencë në Spitalin e Vlorës, por fatkeqësisht nuk ka mundur t’u mbijetojë plagëve.
Burime nga stafi mjekësor bëjnë me dije se viktima ka pësuar dëmtime të rënda në pjesën e fytyrës dhe të grykës, të cilat kanë rezultuar fatale. Pavarësisht përpjekjeve të mjekëve, ai ka ndërruar jetë pak pas mbërritjes në spital.
Në të njëjtin incident është lënduar edhe djali i viktimës, i cili ka marrë plagë të lehta dhe ndodhet jashtë rrezikut për jetën.
Ndërkohë, autori i dyshuar është larguar menjëherë nga vendi i ngjarjes pas konfliktit. Sipas të dhënave paraprake, ai është parë duke u larguar në drejtim të autostradës, ndërsa policia ka nisur menjëherë operacionin për kapjen e tij.
Forcat e Policisë së Vlorës kanë mbërritur në vendngjarje dhe, në bashkëpunim me grupin hetimor, po punojnë për zbardhjen e plotë të rrethanave që çuan në këtë ngjarje të rëndë. Pritet që në orët në vijim të ketë një reagim zyrtar me më shumë detaje mbi shkaqet dhe dinamikën e konfliktit.
