Qeveria ka marrë vendimin për ndalimin e fluturimeve me Britaninë e Madhe si pjesë e masave për frenimin e përhapjes së Koronavirusit, i cili ka infektuar 51 persona në vendin tonë dhe ka marrë jetën e një gruaje të moshuar në Durrës.
Lajmin e ka bërë të ditur kryeministri Edi Rama në një njoftim në Facebook, ku shkruan se fluturimet do të ndalohen sot në orën 23:59.
Fluturimet do të ndalohen nga Shqipëria në Britani por edhe e anasjellta, pra nga Britania në Shqipëri.
Lajmi vjen pasi Ministria e Shëndetësisë njoftoi se ka shkuar në 51 numri i personave të infektuar me Koronavirus në Shqipëri, duke u shtuar 9 raste të reja në 24 orë.
Kryeministri Edi Rama njoftoi se do të ketë një komunikim sot pasdite me presidenten e KE-së, Ursula Von Der Leyen, duke e shtyrë në orën 18:30 mesazhin e përditshëm me qytetarët.
