Ndonëse koronavirusi po përhapet kudo në çdo vend të botës, pa pyetur për vende të zhvilluara apo pak të zhvilluar, vlen të përmendet se niveli ekonomik luan goxha peshë në përballimin e kësaj lufte.
E në këto kushte vende të ndryshme janë solidarizuar e kanë ndihmuar njëri-tjetrin, përfshirë këtu edhe ndihmën që Shqipëria dha ndaj Italisë, duke i dërguar 20 infermierë dhe 10 mjekë.
Së fundmi, Shtetet e Bashkuara të Amerikës kanë sjell në Shqipëri ndihmat e para për përballimin e situatës ndaj COVID-19 dhe lajmi është bërë i ditur nga ministrja e Shëndetësisë, Ogerta Manastirliu.
Ministrja ka shpërndarë dhe disa foto gjatë tërheqjes së ndihmave, teksa shihet se edhe ambasadorja e SHBA Yuri Kim ka marrë pjesë në ndarjen e pakove.
Manastirliu ka shprehur falenderimet për SHBA dhe shkruan se miku i mirë njihet në ditë të vështira, teksa thekson se SHBA ka sjellë mjete të mbrojtjes personale për ekipet mjekësore, që po luftojnë në vijën e parë me armikun e padukshëm.
“Miku i mirë njihet në ditë të vështira! Mirënjohëse për ndihmën e popullit mik amerikan për Shqipërinë me mjete të mbrojtjes personale për ekipet mjekësore në vijën e parë të përballjes me COVID19.
Faleminderit Ambasadore Yuri Kim @U.S. Embassy-Tirana
Jemi #bashkë në këtë luftë COVID-19”, shkruan Manastirliu.
Tashmë ka shkuar në 409 numri total i të prekurve nga COVID-19 në vendin tonë, pasi gjatë 24 orëve të fundit janë shënuar vetëm 9 raste të reja pozitive, nga 234 testime të kryera.
Numri ka rënë sërish sepse dje u raportuan 17 raste të reja, teksa për të tretën ditë radhazi nuk është shënuar asnjë viktimë, duke e lënë në 22 numrin e të vdekurve.
Sipas Ministrisë së Shëndetësisë në spitalin Infektiv ndodhen 52 të shtruar, 5 prej të cilëve në terapi intensive, ndërsa tek “Shefqet Ndroqi” janë shtuar 6 pacientë të tjerë, 5 prej të cilëve në terapi intensive, ku 4 janë intubuar.
Nga ana tjetër numri i të shëruarve ka shkuar në 164./gazetareforma
