Ministrja e Shëndetësisë, Ogerta Manastirliu, ka folur sot për situatën e Covid-19 dhe u shpreh se pandemia tashmë ndodhet ne një fazë të re.
Në një intervistë në “Real Story”, ministrja u shpreh se vatrat e virusit janë shtuar dhe se kjo situatë erdhi pas relaksimit të masave dhe qytetarët neglizhuar rregullat.
“Shqipëria është më mirë në raport me vendet e tjera. Por të krahasohesh për numrin e fataliteteve është e dhimbshme. Kjo sepse është dicka e rëndë në radhë të parë për viktimën, pastaj për familjarët dhe të afërmit. Ne punojmë për të shpëtuar sa më shumë jetë. Pandemia ka ardhur në një fazë të re, ka më shumë vatra”, tha ajo.
Më tej Manastirliu u shpreh se prisnin më shumë bashkëpunim nga ana e qytetarëve, por sipas saj qytetarët nuk janë përgjigjur si duhet.
“Me relaksimin e masave, pësuam edhe relaksim të sjelljes, duke shmangur masat për Covid-19. Kemi pasur madje edhe grumbullimeve, që mund të kenë pasur efekte negative. Sot kemi 90 mijë teste”, u shpreh ministrja.
Sipas saj ekspertët e epidemiologjisë në vend kanë bërë një projeksion ku sipas pritshmërive do ketë raste në rritje me të infektuar. Megjithatë, ministrja tha se nuk pritet rritje eksponenciale dhe se sistemi shëndetësor në vend është i përgatitur për këtë skenar.
Më herët ministrja u bëri edhe një apel të rinjve përmes një statusi në Facebook:
E mirëkuptoj shkujdesjen e moshës, zellin për të relativizuar çdo gjë, madje edhe një sëmundje si kjo që shkakton koronavirusi. E mirëkuptoj edhe prirjen tuaj për të mos besuar ekzistencën e diçkaje që nuk shihet me sy. Ka shumë gjëra që nuk i shohim, por kjo nuk do të thotë që nuk ekzistojnë. Dhe një prej tyre është COVID19, që ka vënë në vështirësi Botën mbarë. Ju lutem, ndaluni një sekondë dhe shihni këtë moment në terapinë intensive në spitalin infektiv pak minuta më parë dhe mendoni pak për prindërit dhe të afërmit tuaj!
