Një ditë pasi mohoi lajmin e vdekjes së tij, Ministria e Shëndetësisë ka konfirmuar lajmin se mjeku i njohur Arjan Pushi ka ndërruar jetë për shkak të Covid-19.
Pushi është mjeku i parë që s’mundi t’i rezistonte dot virusit, pasi kishte disa ditë i shtruar në spital.
Madje, situata e tij u përkeqësua gjatë ditës së djeshme dhe ai u vë në intubim.
Njoftimi i ministrisë:
“Ministria e Shëndetësisë njofton me hidhërim të thellë ndarjen nga jeta të profesorit të Fakultetit të Mjekësisë Arjan Pushi, i cili, referuar shërbimit infektiv, ndërroi jetë pak momente më parë në spitalin Infektiv, i prekur nga COVID19, pavarësisht përpjekjes maksimale të stafit mjekësor.
Prof. Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë.
Ministria e Shëndetësisë i shpreh ngushëllime famljarëve dhe miqve të profesor Arjan Pushit,” njofton MSH.
