E keni parë kudo në internet “Pokemon Go”, por nuk ia keni idenë se për çfarë flasin! Mos u shqetësoni pasi nuk jeni të vetmit.
Të gjithë e lidhim këtë fjalë me një nga filmat vizatimor më të njohur, ku personazhet ishin në ndjekje të disa krijesave të vogla e të mëdha me fuqi të mbinatyrshme për t’i pasur pjesë të koleksionit të tyre.
Erdhi sërish koha që të përjetoni këto emocione të fëmijërisë, por tashmë në realitet!
“Pokemon Go” quhet aplikacioni më i ri që po “çmend” Shtetet e Bashkuara të Amerikë, Australi dhe në Zelandën e Re, i lançuar nga kompania “Niantic” për sistemet Andoid dhe iOS.
Loja u lejon përdoruesve të kapin apo të luftojnë Pokemon-at e ndryshëm gjatë përditshmërisë së tyre. Si arrihet kjo? Pasi të keni instaluar aplikacionin, falë GPS-it në telefonin tuaj celular dhe kamerës, do të mund të argëtoheni duke kapur krijesat virtuale, në jetën reale.
Në fakt, aplikacioni nuk është ende i disponueshëm në Shqipëri dhe në Europë, pak ditë pasi është lançuar, edhe pse nuk janë të paktë ata që dëshirojnë ta kenë në telefonat e tyre.
Por ky aplikacion ka sjellë edhe shumë kritika nga specialistë të mjekësisë dhe psikologëve, për sa i përket shëndetit mendor të përdoruesve.
Jo vetëm që i bën njerëzit akoma më të varur ndaj virtuales, në një kohë kur teknologjia ka përparuar me hapa të mëdha dhe çdo ditë e më shumë e vuajmë këtë problem, por ka rezultuar edhe shkaktar për aksidente rrugore apo edhe për përplasje mes njerëzve. Sigurisht, askush nuk do të dëshironte një njeri që i vjen rrotull shtëpisë së tij në mënyrë të çuditshme! A do ta kuptonit po t’ju shpjegonte se ishte duke ndjekur një Pokemon?
Shumë shpejt të njëjtën situatë presim ta shikojmë edhe në vendin tonë!
Burimi: Daily Mail
