Një sukses befasues pati seriali më i ri austriak “Freud” pas publikimit në NETFLIX, duke u renditur në 10 serialet e preferuara në Itali.
Seriali i mbështetur në një nga figurat më historike i njohur si babai i psikoanalizës, Frojdi, ka elemente historike, okulte, dhe misterioze dhe devijime drejt marrëzive të mbinatyrshme që më besoni, nuk janë për personat me zemër të butë!
Historia e Frojdit të NETFLIX, është e vendosur në vitin 1886 dhe ngjarjet rrotullohen rreth jetës në rini të psikoanalistit, Sigmund Freud, një neurolog i ri 30-vjeçar, i fiksuar me kokainën, i cili sapo është kthyer nga Franca, ku studioi një teknikë inovative të hipnozës për të luftuar histerinë.
Mjeku, megjithëse ka teoritë e tij interesante, nuk gjen pëlqimin e askujt nga kolegët e tij, të cilët tallen me të. Takimi me brunen joshëse, Fleur Salome do të ndryshojë jetën e Frojdit përgjithmonë, kur ai praktikon hipnozën e parë, që do të çojë në zbulimin e autorëve të vrasjeve misterioze.
Subjekti i errët
Teksa ngjarjet zhvillohen, ju do të harroni figurën e mjekut që studion humnerën e mendjes njerëzore. Në këtë serial Frojdi do të katapultohet në një labirint krimesh, hakmarrjesh dhe misteresh, në një aventurë që të kujton pak Sherlock Holmes, për kontekstin historik.
Deri diku duket mjaft tërheqës fakti që arrin të zbulojë vrasjet para se të ndodhin duke hipnotizuar bukuroshen Salome. Por kur subjekti devijon në të kaluarën e saj të frikshme me pushtime shpirtrash dhe një djall të quajtur Taltos, që pushton trupin e Salome, atëherë seriali del nga tematika e krimit dhe futet në atë fantazinë e mbinatyrshme dhe të errët, që do t’ju lërë pa fjalë rreth episodit 5 të serialit me 8 episode gjithsej.
Nga një psikoanalist që studion mendjet njerëzore, Frojdi është i detyruar të zbulojë dhe të prishë një komplot hakmarrës politik austro-hungarez të kryer nga një familje që përdor rituale të lashta të gjakut Satanik për të shpëlarë trurin e skllevërve të saj.
Frojdi përballë kujt…
Frojdi takohet me Salome, gjatë një rituali për komunikimin me shpirtrat, në një vilë që u përket fisnikëve hungarezë, Konteshës Sophia dhe Kontit Viktor von Szapáry (Anja Kling dhe Philip Hochmair). Ata organizojnë rregullisht tubime dhe festa me devijime të magjisë së zezë, në shtëpinë e tyre në Vjenë për të rinjtë e klasit të lartë.
Qëllimi i tyre është të çlirojnë Hungarinë nga bashkimi austro-hungarez përmes fuqisë së hipnozës, por shpesh përfundojnë duke dëmtuar të pafajshmit, madje edhe vetë vajzën që e kanë rritur, Salome, e cila ka fuqi të mbinatyrshme. Ajo përdoret si një kukull në duart e Sophia-s, duke u hipnotizuar me një prekje nga kontesha.
Salome mund të shndërrohet në një vrasëse të egër nën hipnozën e Sophia-s, një armë në duart e saj, dhe të nesërmen të mos mbajë mend asgjë se çfarë ka ndodhur. Por kur hipnotizohet nga Frojdi, ajo arrin të shohë planet e errëta të konteshës që shpesh përfundojnë në vrasje dhe të identifikojë me ndihmën e doktorit dhe dy efektivëve, vrasësit.
Ka ekzistuar vërtet personazhi i Fleur Salome?
Salome është frymëzuar nga një personazh jashtëzakonisht interesant: Lou Andreas-Salomé, shkrimtare dhe psikoanaliste. Ajo ishte një nxënëse e Frojdit dhe mike e mirë e tij. Ishte shumë inteligjente dhe e aftë të “shihte menjëherë lidhjet që të tjerët akoma nuk mund t’i shihnin”. Ashtu si Frojdi, Lou Andreas ishte një psikoanaliste, shoqja besnike e tij, dhe një shkrimtare e subjekteve si feminiliteti dhe narcizizmi, sipas New York Review of Books.
Në serialin e NETFLIX, i cili zhvillohet në vitet 1880, marrëdhënia e Fleur Salome dhe Freud kthehet në një romancë të frikshme, por në të vërtetë ajo ishte shumë më e moshuar kur e takoi Frojdin, sesa Fleur duket në serial. Miqësia e Lou Andreas me Freud filloi kur ata ishin në të 50-tat e tyre dhe u përfol madje se kishte më tepër sesa shoqëri mes tyre, por nuk u konfirmua. Ajo që dihej me siguri është se ajo ka qenë e dashura e Niçes dhe poetit Rainer Maria Rilke. Mbase nuk ishte e zotëruar nga një demon i rrezikshëm hungarez siç ndodh në serial, por e sigurt që kishte një jetë jashtëzakonisht interesante!
A ka ndonjë të vërtetë në këtë histori?
Natyrisht të gjithë e dimë që Frojdi është një personazh që me të vërtetë ka ekzistuar, por nuk ka asnjë provë që ai ka punuar ndonjëherë si detektiv ose që ka ndihmuar ndonjëherë për të zgjidhur disa raste, prandaj komploti kryesor i serialit nuk bazohet në fakte reale.
E vetmja gjë e vërtetë në jetën e tij ishin ndoshta romanet: ai ishte i pasionuar pas tregimeve të Sherlock Holmes dhe një lexues i etur për letërsinë mbi krimin!
E megjithatë, Robert Finster, i cili luan protagonistin e serialit ka studiuar jetën dhe veprat e Frojdit, por jo vetëm: për të kuptuar më mirë teknikat e tij, ai madje iu nënshtrua hipnozës, e cila përfaqëson një element kryesor të psikanalizës frojdiane.
/Iconstyle.al
