Pas deklaratave të kryeministrit Rama se dalëngadalë mund të nisë një lehtësim i vogël i masave të izolimit të ndërmarra në kuadër të epidemisë COVID-19, qytetarët e Tiranës duket se e kanë marrë për të mirëqenë se rreziku i infektimit ka kaluar.
Ditën e premte, rrugët e kryeqytetit janë mbushur nga kalimtarët e madje në rrugët kryesore ka pasur trafik të automjeteve, çka përkthehet në një ulje të vigjilencës, në një kohë kur ekpertët e ISHP-së kanë komunikuar se pikërisht këto ditë po përjetohet piku i të prekurve nga virusi agresiv.
Lidhur me këtë situatë alarmante, “iconstyle.al” ka komunikuar me dr. Pëllumb Piperon, i cili e ka cilësuar këtë fenomen si tejet të rrezikshëm.
“Fakti që ka arritur piku, nuk do të thotë që nuk ka rrezik, por që rreziku tani është më i lartë! Do të thotë që numri i të prekurve është më i larti dhe piku nuk zgjat një ditë, mund të zgjasë dhe një javë.”- është shprehur dr. Pipero në një lidhje telefonike.
Ai theksoi se vigjilenca pikërisht në këtë kohë duhet të jetë maksimale, duke u shprehur: “Edhe pse kurba mund të duket e thyer, rreziku nuk ka kaluar.”
Në përputhje me deklaratën e dr. Piperos janë dhe shifrat e ditës së sotme të bëra publike nga Ministria e Shëndetësisë.
Në 24 orët e fundit, numri i të prekurve është shtuar me 27 raste të reja, një nga shifrat më të larta të regjistruar në një ditë të vetme në Shqipëri, që prej konfirmimit të rastit të parë, çka do të thotë se ky është pikërisht momenti më i gabuar për të ulur vigjilencën dhe mbase do të duhej një tjetër njoftim nga institucionet publike për masat e domosdoshme në këtë situatë.
Deri më tani në vendin tonë janë regjistruar 16 viktima nga koronavirusi, ndërkohë që mosha mesatare e të prekurve është 50 vjeç.
