Duke qenë se numri i personave të infektuar dhe viktimave për shkak të Covid-19 po rritet nga dita në ditë në Kosovë, qeveria ka vendosur të marrë masa të ashpra.
Ministri i Shëndetësisë, Arben Vita, ka bërë të ditur se masat e reja për parandalimin e COVID-19, do të hyjnë në fuqi të mërkurën më 15 prill, duke nisur nga ora 06:00 e mëngjesit.
Kështu, ai i njofton qytetarët se do të mund të dalin vetëm një herë në ditë nga shtëpia e tyre, për 90 minuta.
“Morëm vendimin që përfshijnë masat e reja për parandalimin e sëmundjes ngjitëse COVID-19. Ky kujdes tash e tutje duhet të jetë edhe më i shtuar. Nuk mundemi dhe nuk duhet të tolerojmë edhe lëshimet më të vogla kur në lojë është jeta e qytetarëve tanë. Masat do të hyjnë në fuqi të mërkurën nga ora 06:00 dhe organet përgjegjëse do të përkujdesen që këto masa të zbatohen në përpikëri.
Prej datës 15 prill, nga ora 06:00 ndalohet qarkullimi i personave fizikë, jashtë banesave e shtëpive të tyre, përveç atyre mbi moshën 16 vjeçare, të cilëve u lejohet qarkullim për furnizim me ushqim për barëra dhe prokukte higjienike dhe për të kryer obligimet si: pagesa apo punë bankare.
Kjo lëvizje vetëm për një orë e gjysmë në ditë, bëhet në bazë të shifrës së parafundit të numrit peronal të letërnjoftimit. Për shtetasit e huaj, të cilët nuk posedojnë letërnjoftimin e Kosovës, orari i tyre bëhet në bazë të shifrës së fundit të numrit të pasaportës.
Nuk lejohet shoqërim nga asnjë person tjetër, përveç nëse janë persona me aftësi të kufizuara, dhe personat nën 16-vjeç, me kusht që të jetë i shoqëruar nga një anëtar i të njëjtës bashkësi familjare. Për shkak të rrezikut të lartë për personat në moshë, ju lutemi që personat mbi moshën 65-vjeçare të mos dalin nga shtëpia apo banesa përveç në raste urgjente dhe të domosdodhme për ta.”- u shpreh mininstri.
Deri tani, Kosova numëron 362 raste të infektuara me Covid-19.
