Zbulime tronditëse po dalin në dritë nga Seuli, ku një grua 21-vjeçare po mbahet nën akuzën e vrasjes së dyfishtë, pasi dyshohet se ka përdorur inteligjencën artificiale për të llogaritur dozat vdekjeprurëse të drogës përpara se të helmonte dy burra.
Rasti, i cili ka ngrirë opinionin publik në Korenë e Jugut , filloi të zbulohej pas dy vdekjeve të dyshimta në vetëm dy javë. E akuzuara, e cila identifikohet vetëm me mbiemrin e saj Kim, ndoqi një metodologji specifike. Ndërsa testet toksikologjike zbuluan një kombinim shpërthyes të substancave farmaceutike në trupat e të dy viktimave.
Sipas autoriteteve, dy vdekjet ndodhën brenda një hark kohor prej rreth dy javësh në kryeqytetin Seul.
Rasti i parë u regjistrua më 28 janar, kur Kim u sistemua në një hotel me një burrë rreth të 20-ave. Ajo u largua pas dy orësh, ndërsa viktima u gjet e vdekur në dhomën e tij të nesërmen. Incidenti i dytë ndodhi më 9 shkurt, në një mënyrë të ngjashme, por në një motel tjetër, ku përsëri burri që e shoqëronte vdiq disa orë më vonë.
Edhe pse 21-vjeçarja fillimisht pretendoi se thjesht donte t’i drogonte burrat me benzodiazepina pa ndonjë qëllim vrasës, gjetjet në telefonin e saj celular e ekspozojnë atë në mënyrë të pakthyeshme pasi, sipas policisë, Kim e kishte “bombarduar” ChatGPT me pyetje të tilla si: “çfarë sasie pilulash gjumi me alkool është e rrezikshme?” dhe “a ka mundësi që ky kombinim të shkaktojë vdekjen?”
Një zëdhënës i autoriteteve tha se autorja e krimit ishte plotësisht e vetëdijshme për pasojat e veprimeve të saj, duke përdorur teknologjinë për të konfirmuar rezultatin fatal.
Hetimi tani po merr një dimension thriller, pasi Kim dyshohet se u përpoq të vriste ish-të dashurin e saj në të njëjtën mënyrë dhjetorin e kaluar. Burri ishte pa ndjenja për dy ditë, por arriti të mbijetonte.
Autoritetet në Seul tani po hetojnë hapur mundësinë që 21-vjeçarja të jetë e përfshirë në raste të tjera të pazgjidhura, ndërsa ajo vetë po i nënshtrohet një vlerësimi të plotë psikiatrik.
