Timothée Chalamet ka zbuluar se ka kaluar rreth shtatë vite duke u stërvitur në pingpong për rolin e tij në filmin e ri Marty Supreme. Aktori 29-vjeçar, i nominuar dy herë për çmimin Oscar, interpreton Marty Mauser, një personazh i frymëzuar nga jeta e legjendës së pingpongut Marty Reisman, i njohur në New York-un e viteve ’40.
Duke folur në emisionin The Tonight Show me Jimmy Fallon, Chalamet tha se përkushtimi ndaj këtij roli ka qenë i jashtëzakonshëm. “Ishte një proces stërvitjeje prej gjashtë deri në shtatë vitesh. U takova me regjisorin Josh Safdie në vitin 2018 për këtë film,” shpjegoi ai. Aktori theksoi se stërvitja nuk ka qenë e pandërprerë çdo ditë, por e shtrirë në kohë, me periudha intensive pune.
Sipas Chalamet, stërvitja u intensifikua gjatë pandemisë së COVID-19, duke e përshkruar pingpongun si “një gjë fantastike”. Ai shtoi se kjo përvojë e ka ndihmuar edhe në rritjen personale. “Çdo mëngjes zgjohem me ndjenjën e mirënjohjes. Përderisa më jepet mundësia të punoj, pse të mos jap 10,000% nga vetja?” u shpreh aktori.
Më herët, në një intervistë për BBC, Chalamet kishte treguar se stërvitej sa herë që kishte kohë të lirë, gjithmonë nën drejtimin e një trajneri. Ai madje kishte marrë me vete një tavolinë pingpongu në shkretëtirë gjatë xhirimeve të Dune, si dhe ushtronte mes skenave në setin e filmit Wonka.
Përkushtimi i tij dëshmon edhe një herë seriozitetin me të cilin Chalamet i qaset çdo roli të ri.
