Në fillim është pasioni, ndjenja e fortë që të shtyn drejt tjetrit, emocionet që duken të pafundme. Por me kalimin e kohës, shumë çifte ndiejnë se diçka ndryshon. Faza e dashurisë romantike zëvendësohet nga përditshmëria, përgjegjësitë, fëmijët dhe rutina. Pyetja që shumë njerëz bëjnë është: a e “vret” krijimi i një familjeje dashurinë?
Psikologët theksojnë se dashuria kalon disa faza. Fillimisht është “dashuria romantike”, ku dominon dëshira dhe afërsia fizike. Më pas vjen dashuria e qëndrueshme, që ndërtohet mbi besimin, kujdesin dhe partneritetin.
Kur në mes hyn familja, fëmijët, përgjegjësitë ekonomike dhe menaxhimi i shtëpisë, prioritetet ndryshojnë. Çifti shpesh e vë fokusin te prindërimi dhe jo më te vetja apo marrëdhënia.
“Dashuria nuk zhduket, por transformohet. Ajo kalon nga ndjenja e zjarrtë në ndjesinë e sigurisë dhe mbështetjes,”- shpjegon psikologia amerikane Esther Perel, e njohur për studimet mbi marrëdhëniet afatgjata.
Studimet tregojnë se në vitet e para pas lindjes së një fëmije, kënaqësia në çift bie ndjeshëm. Arsyet janë të shumta: mungesa e gjumit, lodhja, mungesa e kohës për veten dhe për partnerin. Sipas një hulumtimi të Universitetit të Michigan, më shumë se 60% e çifteve ndihen më pak të lidhur emocionalisht pas lindjes së fëmijës së parë. Por kjo nuk do të thotë se dashuria ka mbaruar, thjesht kërkon më shumë punë për t’u mbajtur gjallë.
Në shumë raste, dashuria “mbytet” jo nga familja, por nga mungesa e komunikimit dhe neglizhimi i marrëdhënies. Partnerët fillojnë të shohin njëri-tjetrin vetëm si bashkëprindër dhe jo si çift.
Një darkë vetëm për dy, një fundjavë larg fëmijëve apo edhe një bisedë e hapur për ndjenjat mund të rikthejë lidhjen që dukej e humbur.
“Çiftet që arrijnë të ruajnë intimitetin emocional dhe seksual, edhe në mes të detyrimeve të përditshme, janë ato që e mbajnë dashurinë të gjallë,”– thekson terapistja britanike Helen Fisher.
Në fillim është “tronditëse”, më pas bëhet më e thellë dhe e qëndrueshme. Familja mund të jetë një provë e fortë për dashurinë, por edhe mundësia më e bukur për ta forcuar atë. Dashuria e vërtetë nuk matet me intensitetin e momenteve romantike, por me gatishmërinë për të qëndruar pranë njëri-tjetrit, edhe kur përditshmëria nuk është perfekte.
