Parku Arkeologjik i Apolonisë u kthye për një javë në një laborator të gjallë krijimtarie, ku më shumë se 20 artistë nga vende të ndryshme të Europës dhe më gjerë u bënë pjesë e edicionit të 15-të të kolonisë ndërkombëtare të artit “Apolo Art Colony 2025”.
Në këtë takim unik mes artit bashkëkohor dhe historisë mijëravjeçare, artistët eksploruan hapësirat arkeologjike për të krijuar vepra të frymëzuara nga atmosfera magjike e Apolonisë. Piktura, ide dhe teknika u ndanë në një shkëmbim kulturor që lidh traditën me rrymat më të reja të shprehjes vizuale.
Kuratori i aktivitetit, Saimir Ahmeti, theksoi se Apolonia mbetet një burim frymëzimi i pashtershëm për çdo krijues, ndërsa drejtuesja e parkut, Ornela Durmishaj, nënvizoi rëndësinë e këtij bashkëpunimi për promovimin e trashëgimisë kulturore përmes artit.
Në mbyllje të kolonisë, disa prej pjesëmarrësve u vlerësuan me çertifikata mirënjohjeje për kontributin e tyre në pasurimin artistik të kësaj ngjarjeje me përmasa ndërkombëtare.
