Takeoff, anëtari i grupit rap “Migos”, u qëllua për vdekje të martën (1 nëntor) në Houston.
Reperi 28-vjeçar, emri i vërtetë i të cilit është Kirshnik Khari Ball, ishte në Teksas së bashku me dajën e tij dhe reperin Quavo për Halloween.
Policia u njoftua rreth orës 2:34 të mëngjesit me orën lokale (7:34) në lidhje me të shtënat jashtë “810 Billiards & Bowling Alley” në qendër të Houstonit, ku po zhvillohej një festë private.
Policia e Huston-it konfirmoi në një konferencë për shtyp po të martën se vrasësi i Takeoff është ende i lirë dhe i kërkoi të gjithëve të ndanin me to çfarëdolloj informacioni që mund t’i ndihmojë në zbardhjen e ngjarjes.
Së fundmi detaje të reja duket se kanë dalë në dritë në lidhje me vrasjen e Takeoff.
Një video e siguruar nga “TMZ” tregon një person të dyshimtë duke qëndruar me një armë në brez disa momente përpara se reperi të qëllohej për vdekje.
Personi në fjalë shihet duke qëndruar me një armë teksa Quavo, shoku i grupit të Takeoff, hyn në një debat me dikë.
I njëjti individ mund të shihet më pas me armën e tërhequr përpara se të dëgjohen të shtëna.
Kujtojmë që edhe më herët Shefi i policisë së Houston, Troy Finner u shpreh se ai beson se të dyshuarit ishin të ftuar në festën private.
