Një mjet detar pa pilot ka shkaktuar alarm dhe mister në Lefkada, pasi u zbulua nga disa peshkatarë pranë Kepit Doukato, i njohur edhe si Kavo tis Kyra. Sipas mediave greke, mjeti u gjet brenda një shpelle me motorin ende në funksion, ndërsa pamjet e tij ngritën menjëherë dyshime për përdorim ushtarak ose operacione të specializuara.
Raportohet se bëhet fjalë për një USV, një anije sipërfaqësore pa pilot, e pajisur me sensorë të avancuar, antena dhe sisteme komunikimi të teknologjisë së lartë. Pajisje të tilla përdoren zakonisht për misione mbikëqyrjeje, mbledhje informacioni inteligjent, operacione speciale apo kërkime shkencore të sofistikuara.
Sipas raportimeve, ende nuk dihet origjina e mjetit dhe as qëllimi i pranisë së tij në zonë. Autoritetet po shqyrtojnë mundësinë që droni detar të ketë dalë nga ujërat ndërkombëtare gjatë ndonjë stërvitjeje ose operacioni të paidentifikuar.
Peshkatarët që e zbuluan mjetin e lidhën fillimisht dhe e tërhoqën drejt portit të Vasilikisë, ndërsa pak më vonë në vendngjarje mbërriti Roja Bregdetare Greke, e cila mori në kontroll situatën.
Mediat greke bëjnë me dije se për rastin janë njoftuar edhe shërbimet sekrete ushtarake, ndërsa droni është transportuar në port për ekzaminime të mëtejshme. Ngjarja ka ngjallur interes të madh dhe spekulime, për shkak të teknologjisë së avancuar që mbante mjeti misterioz.
