Tensione të forta te Real Madrid pas një incidenti të rëndë të ndodhur gjatë stërvitjes së ekipit të parë, ku protagonistë ishin Federico Valverde dhe Aurélien Tchouaméni.
Klubi madrilen ka konfirmuar zyrtarisht se Valverde ka pësuar një dëmtim traumatik në kokë pas përplasjes me mesfushorin francez gjatë seancës stërvitore të paradites. Sipas deklaratës së publikuar nga shërbimet mjekësore të klubit, lojtari uruguaian iu nënshtrua ekzaminimeve menjëherë pas incidentit dhe rezultatet treguan një traumë cerebrale.
“Pas testeve të kryera sot nga shërbimet mjekësore të Real Madridit, lojtari Federico Valverde është diagnostikuar me dëmtim traumatik në tru. Valverde ndodhet në shtëpi në gjendje të mirë dhe duhet të qëndrojë në pushim për 10 deri në 14 ditë, sipas protokolleve mjekësore”, thuhet në komunikatën e klubit.
Ngjarja ka shkaktuar reagime të shumta në mediat sportive spanjolle, ndërsa ende nuk janë bërë publike detaje të plota mbi arsyen e konfliktit mes dy futbollistëve.
Ndërkohë, Real Madrid ka njoftuar edhe hapjen e procedurave disiplinore ndaj të dy lojtarëve. Në deklaratën zyrtare, klubi bëri të ditur se rezultatet e hetimit të brendshëm do të publikohen pasi të përfundojnë procedurat përkatëse.
Incidenti vjen në një moment delikat për skuadrën madrilene, duke ngritur pikëpyetje mbi atmosferën brenda ekipit dhe marrëdhëniet mes lojtarëve të dhomave të zhveshjes.
