Dita e dytë e vitit të ri akademik, i ka rigjetur studentët sërish pa pedagogë në universitete. Prej disa ditësh tashmë, pedagogët e universiteteve të Shqipërisë, janë ngritur në protestë, së fundmi duke bojkotuar edhe mësimin.
Përmes një peticioni ata kanë kërkuar rritje të pagës me 50% brenda dy viteve. “Revoltës” së tyre, së fundmi i është përgjigjur Kryeministri i vendit, Edi Rama i cili ndër të tjera u shpreh se jo vetëm që nuk do të ketë një rritje të pagës së pedagogëve, por të përgatiten pasi shumë shpejt do t’i nënështrohen një kontrolli të pasurisë.
Sipas Ramës, ato nuk deklarojnë aq sa marrin.
“E kuptoj mirë që për shkak të një page që është ende jo e kënaqshme në universitetin publik shkojnë në uninversitete private e aty tjetër deklarohet tjetër marrin, është fakt.
Nuk po them të gjithë por është fakt, s’mund të pranojmë të kemi pedagogë të regjistruar në librin e pagave sikur punojnë në fason se nuk e ha njeri, është shumë e rendë kjo, është periudhë kohore por do iu bëjmë thirrje paraprakisht nëse ka mospërputhje mes pagës së deklaruar e pagës së marrë duhet ta korrigjiojnë se procesi do shkojë në kontrollin e pasurisë vetvetiu, si e bën gjithë bota.
Nëse më tregon që ke kaq e ke dy vetura e këtë e ketë, më fal ku i gjen këto? Nuk i gjen nga aktivitete kriminale por nga fshehja e të ardhurave. Realiteti i vërtetë i pagës është ndryshe që të jemi shumë të qartë,”-shtoi Kryeministri.
Edi Rama gjatë fjalës së tij u shpreh gjithashtu se koha kur qeveria rriste pagat në mënyrë uniformë ka mbaruar së bashku me reformën e arsimit të lartë. Sipas Kryeministrit autonomia e universiteteve përkthehet në përgjegjësi. Më tej shtoi se qeveria do të mbështesë ata që i sjellin më shumë shoqërisë dhe ata që janë në gjendje t’i ofrojmë më shumë studentëve.
Në këtë deklaratë, Rama iu drejtua edhe studentëve që shkojnë jashtë vendit, ku i vendosur u shpreh se vendi ynë nuk do të furnizojë më me mjekë dhe infermierë Gjermaninë. Ky grup studentësh do ta marrë diplomën, pasi të punojnë në spitalet tona.
“Nuk mundet dot të furnizojmë mjek Gjermaninë. Paguajmë ne ia bëjmë gati dhe vjen gjermani na i merr. Nuk mund të vazhdojmë kështu. Për fat të mirë nuk kemi mungesë mjekësh dhe infermierësh. Kemi akoma të tjerë që presin të punësohen. Por Italia ka 40 mijë mungesë.
Diplomën e mjekut nuk do ta japim sapo të mbarosh shkollën. Do shkosh t’ia kthesh njëherë popullit tënd atë që ka bërë për ty dhe pastaj shko ku të duash”, -përfundoi Rama.
