Xhaketa e zezë e lëkurës është sërish në modë këtë sezon. Simboli i rokerëve dhe “brezit të humbur” mbetet propozimi i stilistëve edhe për këtë vit. E përshtatshme për stinën e vjeshtës dhe stilit sportiv apo klasik, xhaketa e lëkurës ka “zbritur” nga pasarelat në rrugë.
Kjo xhaketë u ideua fillimisht për pilotët dhe motoçiklistët. Ajo u bë e famshme pas filmit “I egri”, në të cilin e mbante veshur Marlon Brando, në vitin 1953. Dy vjet më vonë, Xhejms Din e përdori në rolin e tij në filmin “Rini e djegur”. Por bumin e vërtetë, kjo xhaketë e pati në mes të viteve ’70, atëherë kur u përhap gjerësisht kultura pank.
Në atë kohë u kthye në simbol falë stilistes Viviene Uestvud dhe grupit legjendar “Sex Pistols”. Më vonë, ajo ishte e përzgjedhura e Majkëll Xheksonit në disa prej klipeve të tij, sidomos në “Thriller” në vitin 1982. Kësaj tendence iu bashkua menjëherë Madona dhe bashkëshorti i saj në atë kohë, Shon Pen.
