S’ka njeri që nuk e ka parë e s’ka dëgjuar për të, edhe nëse s’ka llogari personale në tik Tok dhe nuk e frekuenton këtë rrjet social. I riu Khaby Lame u bë i njohur për të gjithë dhe u kthye në personazhin më të ndjekur në TikTok, vetëm prej mimikave të tij të famshme.
Atë e kanë quajtur “Mr Bean nr 2”, pasi realizon video pa folur asnjë fjalë dhe merr miliona shikime, pëlqime e komente.
Khaby ka rrëmbyer zemrat e të gjithëve. Ai ka lindur në Dakar të Senegalit, por ka emigruar me familjen e tij kur ishte një vjeç. Prej kohësh, TikTok-eri kishte dëshiruar të merrte nënshtetësinë italiane, ëndërr e cila më në fund iu bë realitet.
“Betohem se do të jem besnik ndaj Republikës dhe do të respektoj Kushtetutën dhe ligjet e shtetit”, tha përpara zyrtarëve të Komunës së Chivassotit ai.
“Nuk është e drejtë që një person që jeton dhe rritet me kulturën italiane për kaq shumë vite dhe është i pastër, nuk ka ende sot të drejtën e nënshtetësisë. Dhe nuk po flas vetëm për veten time”, tha Khaby në një intervistë.
“Jam shumë krenar. Jam ndjerë italian edhe para ditës së sotme sepse jam rritur këtu. Por ndjej një përgjegjësi të madhe për betimin që kam bërë, nuk janë fjalë në erë”, tha ylli 22-vjeçar i TikTok.
