Ka shumë shqiptarë të cilët na kanë bërë krenarë përtej kufijve. “Nuk është vetëm Nënë Tereza. Ka edhe 10 shqiptarë tjerë që kanë bërë gjëra të mëdha”. Nis kështu shkrimi i së përditshmes zvicerane “Blick”, e cila përmbledh një listë të 10 shqiptarëve të famshëm, të cilët kanë lënë gjurmë në fusha të ndryshme në gjithë botën.
Gazeta mori shkas nga shenjtërimi i humanistes shqiptare, Nënë Tereza, që ndodhi një javë më parë në Vatikan. “Blick” shkruan se, “Shën Tereza nuk është shqiptarja e vetme që duhet ta njihni”.
I pari në listë gazeta rendit heroi jonë kombëtar, Gjergj Kastrioti. “Skënderbeu ishte një nga mbrojtësit më të mëdhenj të Evropës së krishterë kundër Perandorisë Osmane në shekullin e 15-të”, shkruan e përditshmja zvicerane.
Të dytët në listë janë vëllezërit John dhe James Belushi, aktorë të njohur në SHBA. “Vëllai i madh John vdiq në vitin 1982, derisa James që vazhdon aktrimin, disa herë ka përsëritur për origjinën e tyre shqiptare”, shkruan gazeta.
Pas tyre renditet këngëtarja Rita Ora vjen. Për të gazeta në fjalë përmend faktin se ajo ka lindur në Prishtinë, e më pas prindërit e saj emigruan në Londër, ndërsa prej disa viteve vajza e tyre u bë e famshme në gjithë botën për hitet e saja “Hot Right Now”, “RIP”, “How we do”, etj.
Action Bronson, emri i vërtetë i të cilit është Arian Asllani, është shqiptari tjetër i famshëm. Sot një reper amerikan, ndërsa më parë ai ka punuar si kuzhinier.
E pesta radhitet Era Istrefi. “Blick” shkruan mes të tjerave: “E ardhur nga Kosova, ajo tani krahasohet me emrat më të mëdhenj të muzikës”.
Por paradoksale është fakti që Era vjen e renditur para këngëtares shqiptare me famë botërore Bebe Rexha, ndoshta për faktin që në Zvicër dëgjohet më shumë Istrefi. Sipas të përditshmes zvicerane, nëse ju se keni dëgjuar ende ndonjë këngë të Bebe Rexhës, gjithsesi keni dëgjuar një që ajo e kompozuar, duke e lidhur me hitin e krijuar nga shqiptarja, “Monster” të interpretuar nga Eminem dhe Rihanna.
Balerini amerikano-shqiptar, fitues i edicionit të 15-të të “Dancing with the Stars” në SHBA, Tony Dovolani, është i shtati në këtë renditje.
Pasuar nga një tjetër artiste, shqiptaro-amerikane. Eliza Dushku renditet e 8-ta.
I parafundit ndodhet Patrick Nuo. “Është zviceran”, do të pyesni”, shkruan Blick. Por, gazeta kujton se ai vjen nga Kosova. Sipas “Blick”, albumi i parë “Welcome” e dërgoi Nuo-n në Top 20-she në Gjermani dhe Zvicër, ndërsa prej disa vitesh jeton në Los Angeles, pas sukseseve si kantautor dhe anëtar i jurisë në DSDS.
E listën e përmbyllin, talentet e futbollit Behrami, Shaqiri, Xhaka, etj, që edhe pse me prejardhje shqiptare, gazeta zvicerane i quan “Futbollistët tanë”. Ndërsa i falënderon ata për angazhimin e tyre në përfaqësuesen e Zvicrës në futboll, që së fundi ishin edhe pjesë e “Euro 2016”.
Burimi: Blick
