Nipi i bosit famëkeq meksikan të drogës, Joaquin “El Chapo” Guzman, u kap gjatë një operacioni në Meksikë. I dyshuari, i identifikuar vetëm si Isai “N,” u arrestua në shtetin verior kufitar Sonora pasi ishte në kërkim nga autoritetet amerikane, tha zyrtari i lartë i sigurisë Omar Garcia Harfuch në X. Harfuch tha gjithashtu se 687 kilogramë kokainë, 151 armë dhe 18 granata u sekuestruan në një vend tjetër.
“Këto veprime pasqyrojnë koordinimin e përhershëm të shtetit meksikan për të kapur objektivat prioritare dhe për të dobësuar kapacitetet operative të grupeve kriminale,” shkroi ai.
I ekstraduar në vitin 2017 pasi ishte arratisur dy herë nga burgjet meksikane, El Chapo po vuan një dënim me burgim të përjetshëm në një burg të sigurisë maksimale në Kolorado për disa akuza, përfshirë trafik droge dhe pastrim parash.
Këtë muaj, dokumentet gjyqësore zbuluan se El Chapo u kërkoi autoriteteve gjyqësore amerikane ta transferonin përsëri në vendlindje, duke përmendur “ndëshkimin mizor”.
Bashkëthemeluesi i kartelit famëkeq të Sinaloaa është ankuar vazhdimisht në letra të mëparshme nga burgu për izolimin, kushtet e këqija në qeli dhe mungesën e vizitave familjare. Në vitin 2023, ai iu drejtua presidentit të atëhershëm Andres Manuel Lopez Obrador për ndihmë për shkak të “torturës psikologjike” që pretendonte se po përjetonte në burg.
El Chapo mbahet në burgun “Supermax” në Florence, Kolorado, ku kanë qenë të burgosur edhe disa të dënuar të profilit të lartë, përfshirë Unabomber-in Ted Kaczynski, autorin e bombardimit të Maratonës së Bostonit Dzhokhar Tsarnaev, komplotistin e 11 shtatorit Zacarias Moussaoui dhe bashkëpunëtorin e bombardimit të Oklahoma City, Terry Nichols. Burgu është aq i sigurt, aq i izoluar dhe aq i ashpër sa është quajtur “Alkatrazi i Maleve Shkëmbore”.
Bashkëpunëtorët e El Chapo-s kanë nisur një luftë për kontrollin e kartelit Sinaloa kundër fraksioneve të lidhura me Ismael “El Mayo” Zambada, bashkëthemeluesin e grupit, i cili gjithashtu pret gjyqin në Shtetet e Bashkuara.
Muajin e kaluar, ushtarët meksikanë kapën tre nga aleatët më të afërt të vëllait të El Chapo-s në një operacion të mbështetur nga inteligjenca amerikane. Për vëllain e tij, Aureliano Guzman Loera, i njohur si “El Guano,” ende ka një shpërblim prej 5 milionë dollarësh të ofruar nga SHBA-të për kapjen e tij.
