Universitetet në Shqipëri janë të mbyllura që prej marsit të vitit të shkuar, kur në vendin tonë u konfirmuan rastet e para me COVID-19. Prej atëhere mësimi ka vazhduar online, natyrisht shoqëruar me problematika të shumta.
Edhe pse studentët nuk kanë qenë në auditore, atyre iu është kërkuar të paguajnë tarifën e plotë të studimeve që shpesh shkon në shifra marramendësëe. Në kushtet kur mësimi online nuk ka shkuar siç duhet, qeveria minimalisht duhet të mendonte masa lehtësuese për studentët, të cilët me gjasë kanë mbetur pa punë ata vetë ose prindërit e tyre për shkak të pandemisë.
Një pjesë e madhe e studentëve kanë pasur probleme me internetin, madje disa nuk kanë pasur as akses duke e pasur të pamundur ndjekjen e mësimit online. Gjithsesi studentët nuk kanë lejuar që kjo situatë të kalojë pa reagimin e tyre. Lëvizja prej Universitetin ka nisur prej muajsh një fushatë të gjerë për anulimin e tarifave universitare. Anxhela Nasto, aktiviste e LPU dhe studente e Fakultetit të Shkencave Sociale shprehet se tarifat në kushtet e pandemisë janë absurde.
“Ne kërkojmë anulimin e tarifave universitare pasi gjithmonë tarifat kanë qenë të papranueshme për studentët por në kushtet e pandemisë ato janë absurde. Është e tmershme dhe e ligë nga ana e qeverisë që kërkon tarifa nga studentët në të tilla kushte.”- thotë Anxhela.
Ndër të tjera studentët janë detyruar të paguanë vetë shpenzime ekstra që i janë dashur për mësimin online duke filluar nga paketat e internetit, lidhjet wireless, paisjet e nevojshme si PC e tableta, libra e leksione për të printuar. Me e keqja është se një pjesë e studentëve janë detyruar të paguajnë edhe qiratë e shtrenjta të shtëpive, pasi qeveria njoftoi vetëm dy ditë para fillimit të vitit akademik se mësimi do të mbahej online. Por si po shkon mësimi online?
“Mësimi online ka qenë diskriminues dhe përjashtues. Ai nuk ka qenë realisht mësim pasi shumë studentë nuk kanë marrë pjesë në të.”- vazhdon Anxhela.
Ashtu si në auditor, edhe online një pjesë e mirë e studentëve kanë qenë të diskriminuar për arsye ekonomike. Studentët janë vlerësuar sërish sipas xhepit e jo sipas dijes e meritës. Qeveria nuk mori asnjë masë pas një eksperience të dështuar vitin e kaluar në mësimin online, që të paktën ky vit të ishte më gjithëpërfshirës e më produktiv për studentët. Ndër të tjera, qeveria nuk tenton as të lehtësojë barrën financiare të studentëve, por i kërkon atyre tarifa të plota për fakultete bosh. Vit pas viti studentët kanë paguar tarifa, por investimet mungojnë. Në universitete nuk ka as infrastrukturë e as cilësi kurrikule e mësimdhënieje.
Lëvizja për Universitetin ka dërguar një letër në rektoratet e vendit ku kërkon anulimin e tarifave për këtë vit akademik dhe përgjigjja ka qenë negative e burokratike. Anxhela thotë se nëse kjo kërkesë nuk merret parasysh as nga institucionet që kanë lidhje me arsimin, studentët do të dalin sërish në protesta.
“Duke qenë se e kemi provuar dhe jemi përpjekur shumë herë si me aksione apo kërkesa drejtuar institucioneve përkatëse dhe nuk kemi marrë asnjë përgjigje, në të tilla kushte ne do të vazhdojmë të organizohemi mes vetes, të flasim me sa më shumë studentë, të bëhemi bashkë e në momentin që do të rikthehemi në auditore, të organizohemi e të mbushim sheshet plot për të kërkuar të drejtat tona të mohuara, sidomos në të tillë situatë.”
Studentët janë gjithmonë të gatshëm për të dalë në protestë, të motivuar gjithnjë e më shumë nga shtypja dhe nëpërkëmbja e përditshme që iu bëhet. Parimi si gjithmonë është arsim publik falas, ku më në fund secili do të vlerësohet për atë që di dhe jo nga sasia e parave që mund të ofrojë për një karton diplome.
Në të tilla kushte qeveria duhet të paktën të marrë masat që t’i sigurojë studentëve të drejtat dhe mjetet e nevojshme qoftë për mësimin online apo edhe për atë në auditore, ndryshe përgjigja e tyre do të jetë e qartë.
