Duke qenë se rastet me Covid në vendin tonë sa vijnë dhe po shtohen çdo ditë, brenda një afati të shkurtër të gjithë Spitalet Covid të ngritura nga qeveria, rrezikojnë ezaurimin e kapaciteteve.
Ministrja e Shëndetësisë, Ogerta Manastirliu, ka deklaruar se në rast të një skenari të mundshëm ku do të tejkalohen kapacitetet spitalore të spitaleve Covid, do të vihen në funksion edhe spitalet rajonale.
Mirëpo a janë të gatshme spitalet rajonale të përballojnë fluksin e rasteve me COVID? Në rast se infrastruktura, stafi mjekësor dhe mjetet nuk do të jenë të duhura, mundësia më e madhe është që këto spitale të kthehen në vatra të reja epidemiologjike dhe jo e kundërta.
Kujtojmë se Ministrja e Shëndetësisë dhe Mbrojtjes Sociale, Ogerta Manastirliu, së bashku me Ambasadorin e Bashkimit Europian në Shqipëri, Luigi Sorecan, morën pjesë në ceremoninë e dorëzimit të paketës së pestë të mbështetjes së Bashkimit Europian për Shqipërinë më 8 shtator.
Gjatë kësaj ceremonie, Ministrja Manastirliu u shpreh se:
“Me strategjinë e përballimit të epidemisë gjatë periudhës vjeshtë-dimër , fuqizojmë strukturat spitalore, jo vetëm për 4 strukturat spitalore COVID që kanë një kapacitet rreth 500 shtretërish të dedikuar, por edhe në vijim të të gjithë projeksioneve që ekspertët tanë na kanë vënë në dispozicion për t’iu përgjigjur edhe flukseve në rritje, do të dyfishojmë kapacitetet me shtretër, duke përfshirë edhe spitalet rajonale”, është shprehur Manastirliu.
Ndërkohë që kjo deklaratë është bërë dy muaj më parë, më 8 shtator, ministria dhe institucionet e tjera përgjegjëse, akoma nuk e kanë filluar këtë angazhim në spitalet rajonale, ndërkohë që rastet po shtohen çdo ditë e më shumë dhe situata duke e zymtë dhe kritike.
Deri më tani shumica e spitaleve rajonale gjenden në “pikë të hallit”, ku shumë prej tyre nuk kanë realisht kushte për të përballuar flukse pacientësh me covid-19, pasi nuk kanë hapësirat e duhura, mungesë stafi mjekësor, infrastrukturë të keqe dhe mungesë medikamentesh bazike.
Bazuar në Fondin e Sigurimit të Detyrueshëm të Kujdesit Shëndetësor, FSDKSH, të gjitha spitalet publike, ku futen 5 spitalet universitare, 11rajonale dhe 24 spitalet bashkiake, kanë marrë të gjitha së bashku një buxhet prej 17.8 miliardë lekësh për vitin 2016.
Në një analizë të Fondit, tregohet se se kostoja mesatare e trajtimit për pacient varion nga 37.7 mijë lekë në spitalet rajonale në 48.1 mijë lekë në spitalet bashkiake. Në pesë spitalet universitare të Tiranës kostoja është mesatarisht 40.4 mijë lekë për pacient.
Paradoksalisht, spitale të ngjashme me atë të Peqinit kanë kosto deri në 10 herë më të larta se mesatarja e trajtimit për pacient. Në krye të kësaj liste gjendet spitali i Mallakastrës, i cili u financua nga Fondi i Sigurimeve me 430 mijë lekë për pacient në vitin 2016, i ndjekur nga spitali i Peqinit me 335 mijë lekë dhe spitali i Delvinës me 243 mijë lekë për pacient.
Këto paradokse janë një tregues se spitalet rajonale nuk janë ende gati për të marrë përgjegjësinë e trajtimit të pacientëve me Covid-19.
Para se qeveria dhe ministria e Shëndetësisë të propagandojë në çdo moment se çdo gjë është në rregull dhe se situata është në kontroll, më mirë të zbarkojë në terren dhe të ngrejë struktura për plotësimin e kushteve në spitalet rajonale, para se të jetë shumë vonë!/Iconstyle.al/
