Komiteti Teknik i Ekspertëve njoftoi ditën e djeshme masat e reja për parandalimin e përhapjes së Covid-19. Mira Rakacolli, kryetarja e komitetit të ekspertëve, deklaroi se do të kufizohet lëvizja e qytetarëve nga ora 22:00-06:00 në të gjithë vendin, me përjashtim të lëvizjes për motive pune, emergjenca shëndetësore apo nevoja të domosdoshme. Gjithashtu duke e nisur nga dita e nesërme do të ndalohen aktivitetet e bareve – restoranteve nga ora 22:00 – 06:00 (përveç shërbimit delivery. Ndërsa administrata duhet të punojë nga shtëpia gjatë kësaj kohe.
Në një konferencën me gazetarët ditën e sotme, Ogerta Manastirliu bëri me dije se për të gjithë ata qytetarë që lëvizin nga shtëpitë e tyre pas orës 22:00 pa një autorizim përkatës, do të futet sërish në fuqi akti normativ që u firmos më 15 mars.
Por cilat janë ndëshkimet?
Çdo qytetar që shkel orarin policor pa një arsye të domosdoshme dhe pa një autorizim nga e-albania, gjobitet me 10 mijë lekë të reja.
Kush lëviz me makinë, pa një autorizim të posaçëm nga e-albania, i hiqet leja e drejtimit.
Të gjithë ata biznese që nuk i binden urdhërit dhe qëndrojnë hapur pas orës 22:00, gjobiten nga 500 mijë lekë deri në 1 milionë lekë të reja. Kush e përsërit shkeljen, i hiqet mundësia për të ushtruar aktivitetin për gjashtë muaj.
Çdo i infektuar me Covid-19 që nuk zbaton karantinimin nga pakujdesia merr gjobë deri në vite burg. Ai që e bën me dashje rrezikon 2-5 vite burg. Kur ka pasoja të rënda në njerëz, personi në fjalë rrezikon 3 deri në 8 vite burg.
