Disa muaj më parë, disa deputetë të Partisë Socialiste, Klotilda Bushka, Ervin Bushati dhe Elisa Spiropali, akuzuan kreun e PD-së, Lulzim Basha për një skemë “haraçi”.
Ata treguan sesi Basha sulmonte gjatë ditës sipërmarrës të ndryshëm për kontrata publike dhe natën, po këta sipërmarrës firmosnin kontrata private financiare me një kompani, në pronësi të familjarëve të tij.
Sot, Gjykata e Tiranës zbardhi vendimin që cilësoi si të vërteta akuzat e deputetëve të PS-së.
Kreu i grupit parlamentar, Taulant Balla, e ka akuzuar publikisht Bashën për këtë çështje, duke u shprehur se ky është një vendim i rëndësishëm që çmonton politikën e pisët të shpifjeve dhe “haraçit” nga ajo që ka mbetur nga ish-Partia Demokratike e Shqipërisë.
Mesazhi i plotë i Taulant Ballës:
Muaj më parë deputetët e Grupit Parlamentar Socialist Ervin Bushati, Klotilda Bushka dhe Elisa Spiropali zbuluan një skemë “haraçi”, sesi ditën Lulzim Basha sulmonte sipërmarrës të ndryshëm për kontrata publike dhe natën po këta sipërmarrës firmosnin kontrata private financiare me një kompani në pronësi të familjarëve të tij.
Lulzim Basha nuk ktheu asnjëherë përgjigje dhe nuk dha shpjegime për këto përfitime që shkojnë në disa milionë euro. Gjykata e Tiranës zbardhi sot VENDIMIN që i cilëson gjetjet e deputetëve të vërteta. Ky është një vendim i rëndësishëm që çmonton politikën e pisët të shpifjeve dhe “haraçit” nga ajo që ka mbetur nga ish-Partia Demokratike e Shqipërisë.
Lulzim Basha duhet tu kthejë përgjigje protestuesve të Kuksit, të “Astirit”, që i thirri në protestë ditën, por natën i paska parë hajrin me kontrata pafund.
Në ndihmë të transparencës dhe pa e kaluar këtë çështje me kundërakuza bajate, e këshilloj t’i zbardhë vetë kontratat.
TUNG
