A mund ta harrosh dashurinë e parë nëse ka qenë e vërtetë?! Të gjithë kemi (ose mendojmë se kemi) dashuruar kur kemi qenë shumë të rinj.
Në mos e kemi përjetur vetë, kemi qenë dëshmitarë të dashurive të mëdha të dy të rinjve, shanset e të cilëve për të gabuar janë më të larta në moshë të re. E kemi fjalën për ato lidhje, me ndarje e bashkime, ku pas shumë përpjekjesh pas një bashkimi bëjnë sërish të njëjtat gabime. Ndoshta kjo është arsyeja pse shumë i kanë humbur sot këto dashuri.
Romani i Sally Rooney i vitit 2018, “Normal People”, flet pikërisht për një nga ato marrëdhënie, ku lëndojmë dhe lëndohemi dhe mundohemi, ta bëjmë lidhjen të funksionojë.
Dhe Hulu ka bërë një përshtatje vërtet të bukur të këtij romani në një serial mjaft romantik/erotik prej 12 pjesësh publikuar më 29 prill, që fokusohet mbi dashurinë e dy të rinjve, që besojnë se nuk janë bërë për njëri-tjetrin, por kur janë bashkë, e gjithë bota është me ta.
Kush janë dy protagonistët
Marianne (Daisy Edgar-Jones) dhe Connell (Paul Mescal) janë protagonistë të një dashurie në moshë shumë të re, që na bën të kryqëzojmë gishtat që çdo gjë të shkojë mirë. Ata ndjekin të njëjtën shkollë të mesme në Irlandë, por vijnë nga shtresa sociale të ndryshme. Nga njëra anë, nëna e Connell punon për nënën e Marianne si pastruese shtëpie. Por nga ana tjetër, ai është një djalosh i famshëm që e duan të gjithë në shkollë.
Një sportist që mëson, i apasionuar pas letërsisë dhe më i miri nga grupi i djemvë çapkënë që e teprojnë me shakatë dhe lëndojnë të tjerët, por jo aq i mirë saqë t’u tregojë atyre se e kanë gabim.
Ajo, ndërkohë, është e zgjuar dhe me botë të madhe shpirtërore, lloji i vajzës së pavarur, por të mbyllur, që nuk përpiqet aspak të duket bukur por që thjeshtësia e bën më të bukur edhe pse ajo nuk e di këtë. Marianne ndjen se nuk e do askush në familjen e saj, as nëna e saj karrieriste dhe as vëllai i cili është tepër xheloz për të. E rritur pa dashuri, ajo mendon se e meriton mungesën e dashurisë të familjes.
Lidhja një ‘turp’ për Connell, apo për Marianne?
Nga statusi duket sikur Marianne është më lart se Connell, por nëse dikush mëson për marrëdhënien e tyre, atëherë kjo do të jetë më keq për Connell sesa për Marianne-n. Ju duket e çuditshme apo jo! Epo kjo ndodh në Irlandë!
Jemi mësuar të shohim në çdo film me të rinj në një shkollë, se të qenit i pasur shkon paralel me të qenit i famshëm dhe popullor. Por kjo nuk ndodh te Normal People.
Këngëtari me origjinë irlandeze, Bono dikur tha: “Në Shtetet e Bashkuara, kur shikon një person që jeton në një rezidencë në kodër mendon: ‘një ditë, nëse punoj shumë, do të jetoj në atë rezidencë’. Ndërsa në Irlandë, njerëzit shohin dikë në një rezidencë dhe thonë: ‘Një ditë, do ta kap atë bastard”.
Ndaj dhe Connell nuk e kishte menduar fare lidhjen me Marianne, vajzën pasanike që duket sikur e urren e gjithë shoqëria e tij. Por kur ajo i hap zemrën dhe i thotë se e pëlqen, atëherë ai pranon të lidhet me të me kusht që ta mbajnë lidhjen të fshehtë. Por a do të mundet ai të jetë i dashuri që të mbron kur të tjerët të tallin, të fyejnë, madje edhe të ngacmojnë seksualisht?!
Të duash dikë, por të mos ia tregosh askujt!
Përkushtimi i Connell-it në këtë marrëdhënie është aq ekstrem saqë ai e injoron Marianne-n në shkollë – madje edhe kur ajo po ngacmohet mizorisht nga shoqja e tij më e mirë. Dhe kur ata përfundimisht lidhen me njëri-tjetrin, ai sërish nuk pranon të tregojë dashuri në publik, as edhe një puthje!
Sjellja e tij ushqen bindjen e Marianne se ajo meriton dhimbje në vend të dashurisë. Sjellja shfrytëzuese e Connell dhe aspektet e ashpra të vetë-urrejtjes që krijon Marianne, e çojnë marrëdhënien e tyre drejt humnerës!
Seksi i bashkon!
Skenat e seksit janë aq të bollshme në serial (mos e shihni me prindërit rrotull), por do të dini të bëni dallimin mes atyre erotike dhe atyre artistike. Do të jeni dëshmitarë edhe të marrëdhënies së tyre të parë intime, me kërkesë të Marianne-s e cila do që të humbë virgjërinë me Connell.
Seksi do të bëhet një element i rëndësishëm në lidhjet e tyre që do t’i bashkojë më shumë se do t’i ndajë! Ne do t’i shohim teksa rriten nga shkolla e mesme drejt kolegjit. Do të jemi dëshmitarë të ndarjeve dhe bashkimeve, ndonjëherë si miq dhe ndonjëherë romantikisht, ndonjëherë kur ai është i lidhur me dikë tjetër, dhe ajo gjithashtu.
Në shtrat ose jashtë tij, secili ka diçka që dëshiron dhe i mungon: nga mirësia e Connell, te vendosmëria e Marianne.
“Ti gjithmonë thua se çfarë mendon”, i thotë ai asaj. “Unë nuk jam kështu”.
I gjithë seriali është një kronikë sesi kjo dashuri merr një larmi formash teksa rritesh dhe i prek njerëzit thellësisht, ndonjëherë në mënyra të papritura. Dhe të jemi të sinqertë nuk ka një fund, sepse e tillë është dashuria mes tyre.
Dy njerëz që janë përgjithmonë të lidhur me njëri-tjetrin nga një histori e përbashkët, që s’mund të ndahet me askënd tjetër.
/Iconstyle.al
