Rama ka prezantuar dje paketën e dytë ekonomike, duke bërë me dije se do jetë 176 mijë qytetarë që do ndihmohen, duke marrë nga 400 dollarë secili.
Sakaq, në këtë paketë të dytë u përfshi edhe turizmi, teksa sektori i turizmit, fasonët dhe bizneset prodhuese do të kenë në dispoziocion një garanci sovrane 150 milionë dollarë me ndarje risku mes qeverisë dhe bankave.
Mbrëmjen e sotme, ministrja e Ekonomisë dhe Financave, Anila Denaj, në një lidhje me Skype për “Real Story” tha se paga 40 mijë lekë të reja do të jepet vetëm për muajin prill, jo për majin.
Denaj duke u ndalur te biznesi, tha se ka shumë kërkesa që vijnë prej tyre, por më të rëndësishmet janë marrë parasysh, siç ishte dhe shtyrja e tatim-fitimit për në vitin 2021.
“Me këtë pagesë ne kemi kuptuar që situata do vazhdojë deri në maj, por pagesa është e vetme, një herë dhe nuk është e përsëritur në maj. Janë kërkesa që janë artikuluar që ditën e parë të mbylljes së biznesit. Disa kërkesa në fillim kanë qenë të panevojshme për t’u materializuar, pasi ato duhen materializuar me fakte, që të mbështeten nga qeveria. Sot kishim një ankesë të përmbledhur mbas një anketimi të 360 bizneseve, ku pamë dhe ju shkuam të gjitha problematikave. Rimbursimi i TVSH ishte në thelb. Biznesi kërkon me të drejtë që rimbursimi i TVSH të shkojë në kohë reale, pa burokraci dhe pa vonesa. Kërkesa të tjera kanë qenë në lidhje me pjesën e tatim-fitimit, ku në momentin e parë edhe ne si ministri kemi artikuluar rivlerësimin si një instrument që ekziston prej kohësh. U vendos që tatim-fitimi të shtyhej për 2021. Tatim-fitimi paguhet çdo muaj, si referencë përdoret tatim-fitimi i vitit të mëparshëm.”
Më tej, ministrja u shpreh se paketa e dytë ka si qëllim të ndihmojë punonjësit e larguar nga biznesi i madh kurse për këtë të fundit thotë se lehtësimet tashmë janë bërë.
Sipas saj paketa kërkon që punonjësit të mos humbasin vendin e tyre të punës, pasi u jep mundësi bizneseve që marrin kredi për të dhënë pagat. Reagimi i nga qeveria erdhi pasi pa se 40 mijë punonjës humbën punën.
“Ndërkohë pagesa që i bëhet biznesit të madh, janë dy elemente që ndalojnë largimet nga puna. Ndërkohë janë 20 mijë biznese që janë mbyllur dhe janë me xhiro mbi 14 milionë lekë janë dhe bizneset e turizmit. Në këtë zgjerim pakete biznesi i madh e ka marrë vëmendjen dhe për të ndaluar largimin. Por bëhet nga pronarët që vendosin si do të jetë situata dhe shpresoj që mos rritet papunësia dhe zgjerimi i aktivitetit të biznesit nuk do të ndodhë që në maj të hapen të gjitha bizneset por është shtysë që pas majit të riorgtanizojnë aktivitetet e tyre dhe mos e mendojnë marrëdhënien me punonjësit siç është tani”, u shpreh Denaj. /gazetareforma
