Ka shkuar në 446 numri i të infektuarve me koronavirus në Shqipëri, me 13 raste të reja në 24 orët e fundit. Deri më tani 23 persona kanë humbur jetën nga COVID-19. Harta e të prekurve zgjerohet në Tiranë me 6 raste, 5 në Shkodër dhe 2 në Durrës, të cilët sipas Ministrisë së Shëndetësisë janë kontakte të raste të para, jo vatra të reja.
Gjatë 24 orëve të fundit, 20 pacientë të tjerë i janë shtuar listës së të shëruarve duke e çuar numrin total në 217. Po ashtu mësohet se në spitalin Infektiv janë 41 pacientë të shtruar, nga të cilët 6 në terapi, 2 prej tyre të intubuar. Ndërkohë në spitalin Shefqet Ndroqi, COVID 2, janë të shtruar 8 pacientë, 6 në terapi dhe 5 të intubuar.
79 raste të reja me koronavirus në Kosovë
Janë konfirmuar 79 raste të reja me COVID-19, duke çuar në 362 numrin e të infektuarve në Kosovë.
Kjo është bërë e ditur nga IKSHPK-ja përmes një njoftimi për media.
“Në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 250 mostra të marra nga Klinikën Infektive, gjurmimi i kontakteve të rasteve në terren si dhe nga karantina në Qendrën studentore. Me SARS CoV-2 pozitiv sot janë diagnostikuar gjithsej shtatëdhjetë e nëntë (79) raste”, thuhet në njoftim.
Deri më sot në Kosovë janë kontaktuar dhe janë nën mbikëqyrje 4.795 kontakte të rasteve të infektuara.
40 punonjës të Shëndetësisë të infektuar në Maqedoninë e Veriut
Gjithsej 40 punonjës shëndetësorë në spitalin e Kumanovës janë të infektuar me Koronavirus, konfirmoi drejtoresha Snezhana Zaharieva.
“Që nga fillimi i pandemisë, 40 punonjës shëndetësorë janë infektuar me Koronavirus, pesë prej tyre janë negativë, domethënë të kuruar”, tha Zaharieva.
Disa ditë më parë, Departamenti i Gjinekologjisë i spitalit po punonte në një mënyrë të veçantë, nga ku ishin infektuar edhe disa punonjës shëndetësorë.
Deri më sot janë regjistruar 828 raste me Koronavirus, ndërsa janë shënuar gjithsej 34 vdekje në vend, pra niveli i vdekshmërisë është 4.1 përqind, ndërsa shkalla e vdekshmërisë në botë është 6.2%, veçanërisht në Shtetet e Bashkuara dhe tre vende në Evropës.
Ulet bilanci i të vdekurve në Itali dhe Francë
Shkalla e vdekjes në Itali dhe Francë – dy nga vendet më të prekura nga koronavirusi – duket se po ulet, pasi numri i njerëzve të konfirmuar me virus në të gjithë botën u rrit përtej 1.8 milionë.
Agjencia e Mbrojtjes Civile në Itali raportoi numrin më të ulët të vdekjeve nga koronavirusi që nga 19 Marsi, me 431 vdekje të regjistruara në 24 orët e fundit, krahasuar me 619 një ditë më parë.
Franca raportoi 315 vdekje në spital gjatë ditës së fundit, krahasuar me 345 një ditë më parë. Presidenti Emmanuel Macron do t’i drejtohet vendit për herë të tretë të hënën, kur pritet të theksojë nevojën që izolimi të vazhdojë.
Në nivel global, më shumë se 114,000 njerëz kanë vdekur nga koronavirusi, ndërsa gati 422,000 janë shëruar, sipas të dhënave të përpiluara nga Universiteti Johns Hopkins.
Kinë, rriten rastet e importuara të koronavirusit
Komisioni Kombëtar i Shëndetit thotë se ka pasur 108 raste të reja të virusit në fund të 12 Prillit, dhe se të gjitha, përveç 10 prej atyre rasteve janë importuar nga jashtë vendit.
Ndërkohë, nuk u raportua asnjë rast të ri në Hubei, ku shpërthimi i epidemisë filloi për herë të parë në fund të vitit të kaluar, por pati dy vdekje të tjera.
Bilanc tragjik në SHBA
Viktimat amerikane të pandemisë tejkalojnë shifrën e 22,000, sipas Universitetit Johns Hopkins, një rritje prej mbi 1.500 në ditën e fundit.
Rastet në Shtetet e Bashkuara arritën në 555,313. Shteti i Nju Jorkut mbetet ai më i prekur nga pandemia, me 6.898 vdekje dhe 104.410 infeksione.
/Iconstyle.al
