Me rritjen e temperaturave, përdorimi i kondicionerit bëhet pothuajse i domosdoshëm në çdo shtëpi, sidomos kur ka fëmijë të vegjël. Megjithatë, shumë prindër vazhdojnë të kenë dilema nëse ajri i kondicionuar mund të ndikojë negativisht tek të porsalindurit apo fëmijët e vegjël.
Specialistët theksojnë se kondicioneri nuk paraqet rrezik nëse përdoret në mënyrën e duhur. Përkundrazi, ai ndihmon në ruajtjen e një temperature të qëndrueshme në ambient, duke shmangur mbinxehjen apo ftohjen e trupit tek fëmijët.
Temperatura ideale në dhomën ku qëndrojnë fëmijët duhet të jetë nga 24 deri në 27 gradë Celsius. Po ashtu, shumë e rëndësishme mbetet edhe lagështia e ajrit, e cila rekomandohet të jetë rreth 50-55%, pasi ndikon drejtpërdrejt në frymëmarrje dhe komoditetin e tyre.
Ekspertët këshillojnë që fëmijët të mos ekspozohen kurrë drejtpërdrejt ndaj ajrit të kondicionerit. Gjithashtu, rekomandohet që dhoma të ajroset për disa minuta çdo 2-3 orë, në mënyrë që ajri të qarkullojë natyrshëm.
Një tjetër këshillë e rëndësishme lidhet me shmangien e ndryshimeve të menjëhershme të temperaturës, sidomos gjatë verës. Në rastet kur udhëtoni me makinë, sugjerohet që kondicioneri të fiket pak minuta para se të zbrisni.
Po aq e rëndësishme është edhe mirëmbajtja e filtrave të ajrit, pasi filtrat e papastër mund të bëhen burim bakteresh dhe infeksionesh. Ndërsa gjatë natës, ekspertët rekomandojnë që kondicioneri të fiket ose të përdoret me kujdes maksimal.
