Më herët ditën e sotme u raportua se në vendin tonë është shënuar viktima e 24 nga koronavirusi pasi një i moshuar ka ndërruar jetë në Shkoder.
Së fundmi, lidhur me këtë lajm ka ardhur edhe reagimi i Ministrisë së Shëndetësisë, që me anë të një njoftimi për shtyp bën me dije se i moshuari nuk ka vdekur si pasojë e virusit, por ka pësuar infarkt të miokardit.
Sipas Ministrisë, 85-vjeçari ka qenë bartës i COVID-19, i konfirmuar gjatë hetimit epidemiologjik të kryer tek të gjithë anëtarët e familjes së tij në Shkodër, por ka qenë asimptomatik gjatë gjithë kohës, pra pa shenja të sëmundjes.
I moshuari prej dy muajsh qëndronte i palëvizur për shkak të një frakture koksofemorale dhe vuante nga diabeti mellitus, sëmundje kardiake dhe hipertension.
Po ashtu, bëhet e ditur se sot viktima është dërguar në banesën e fundit në orën 14:00, ku nuk u lejuan persona të tjerë, veç familjarëve.
Aktualisht, Shkodra është qyteti i dytë, pas Tiranës, për numrin e lartë të të prekurve dhe deri tani numëron 49 raste.
Njoftimi i plotë
“I moshuari 85-vjeçar, me inicialet E.L., i cili ka ndërruar jetë në banesën e tij në Shkodër, nuk ka humbur jetën si pasojë e COVID19.
I moshuari, i cili prej dy muajsh qëndronte i palëvizur për shkak të një frakture koksofemorale dhe vuante nga diabeti mellitus, sëmundje kardiake dhe hipertension, ka ndërruar jetë si pasojë e infarktit të miokardit ditën e sotme.
85-vjeçari ka qenë bartës i COVID19, i konfirmuar gjatë hetimit epidemiologjik të kryer tek të gjithë anëtarët e familjes së tij në Shkodër, por ka qenë asimptomatik gjatë gjithë kohës, pra pa shenja të sëmundjes. 85-vjeçari ndiqej nga mjeku i familjes, i cili ka konfirmuar se shkaku i vdekjes është infarkti i miokardit.
Ministria e Shëndetësisë dhe Mbrojtjes Sociale i shpreh ngushëllime familjes së të ndjerit dhe siguron opinionin publik se do të informojë për situatën, sikundër ka bërë deri tani. Sqarojmë edhe një herë se 85-vjeçari, nuk është viktimë e COVID19 në Shqipëri”.
Sakaq, ka shkuar në 416 numri i të prekurve nga koronavirusi në vendin tonë, pasi në 24 orët e fundit janë shënuar vetëm 7 raste të reja, nga 162 teste të kryera.
Po ashtu, gjatë 24 orëve të fundit janë shëruar 17 persona, duke e e çuar numrin në 182, ndërsa betejën me COVID-19 e kanë humbur 23 pacientë.
Në spitalin Infektiv ndodhen 50 persona, 6 prej të cilëve në terapi intensive, ku një është intubuar, ndërsa në spitalin “Shefqet Ndroqi” ndodhen 6 pacientë, 4 prej të cilëve janë intubuar.
