Shefja e Epidemiologjisë në Institutin e Shëndetit Publik, Eugena Tomimi, ka realizuar sot një intervistë me emisionin “Open” në Top Channel.
Sipas saj, parashikohet që mesi i muajit prill të jetë piku i epidemisë Covid-19 dhe pa u ulur kurba s’do të mund të dalim nga karantina.
Tomimi tregoi se virusi mund të kthehet sërish në vjeshtë jo vetëm tek ne, por në mbarë botën, megjithatë theksoi që ky është vetëm një parashikim dhe ende nuk dihet saktësisht se si do të shkojë situata.
“Është një virus i panjohur për mbarë botën. OSHB-ja bëri një deklaratë që të mos e neglizhojmë virusin asnjëherë. Ky virus mund të kthehet sërish në vjeshtë më infeksionet virale. Mund të kthehet në mbarë botën jo vetëm në vendin tonë. Sipas disa llogaritjeve, piku pritet që të arrihet në mesin e prillit. Pa u ulur kurba nuk duhet të dalim nga karantina. Por theksoj se kjo është një situatë që nuk mund të parashikohet.”- u shpreh Tomimi.
Deri tani, në vendin tonë janë konfirmuar 243 raste të infektuara me Covid-19, ndërsa 15 persona fatkeqësisht kanë ndërruar jetë për shkak të koronavirusit.
Shpërndarja gjeografike e rasteve pozitive, është si vijon:
– Tiranë 129 raste
– Durrës 26 raste
– Lushnje 4 raste
– Elbasan 5 raste
– Fier 23 raste
– Kavajë 4 raste
– Rrogozhinë 2 raste
– Korçë 15 raste
– Vlorë 5 raste
– Shkodër 8 raste
– Lezhë 5 raste
– Berat 1 rast
– Has 2 raste
– Krujë 5 raste
-Tropojë 4 raste
– Pukë 3 raste
– Mirditë 2 raste
