Kryeministri Edi Rama ishte në një lidhje direkte sot me televizionin italian Rai3, ku foli kryesisht për dërgimin e 30 mjekëve dhe infermierëve në Itali.
Ai tregoi sesi lindi ideja e kësaj nisme duke folur me ministrin e Jashtëm, ndërsa u pyet edhe për deklaratat e disa prej mjekëve që u shprehën se u larguan pa lejen e prindërve në Itali.
Gazetarja: E vërtetë është që disa prej tyre u nisën pa lajmëruar prindërit sepse kishin frikë se mos prindërit do t’i ndalonin?
Rama: Po në fakt, ma kanë thënë këtë gjë vetëm në aeroport. Po t’u kishim thënë prindërve më thanë, s’do na kishin lënë, kështu që thamë t’i marrim kur të jemi në Itali.
Gazetarja: Ne ju sigurojmë se do kujdesemi për ta, ju na ndihmuat dhe ne do ua shpërblejmë. U themi prindërve të tyre që do kujdesemi shumë mirë për ta.
Rama foli edhe për qasjen e Evropës ndaj Italisë në këtë periudhë të vështirë:
“Ajo që ndodh në Evropë në përgjithësi, nuk ishte se pritej që ta nxirrte në pah ky virus, është humbje e kujtesës se pse vetë Evropa është krijuar si një hapësirë, paqeje, bashkëpunimi. Të shohësh Italinë në një situatë të tillë të bën të ndihesh keq, por nga ana tjetër jemi përballë një armiku që na ka sulmuar të gjithëve. Është shtëpia jonë e përbashkët që digjet dhe nuk mund të rrimë të gjithë të mbyllur në dhomën tonë dhe të iluzionojmë që nëse digjet një dhomë nuk do të djegë tjetra.
Njerëzit duhet të rrinë në shtëpi, por shtetet nuk duhet të rrinë në shtëpi, duhet të projektojnë kundërsulmin. Nuk mund të fitohet një luftë botërore nëse shtetet nuk rrinë në shtëpi si njerëzit”, tha Rama.
