Kryeministri Edi Rama në një video mesazhin e sotëm bëri me dije se në fillim të prillit, biznesi i vogël do të marrë pagën e luftës.
Kreu i qeverisë njoftoi se edhe ndihma ekonomike është dyfishuar për familjet në nevojë. Në fillim të prillit, Rama tha se “do indeksojmë pensionet dhe do japim 20 mln euro plus për pensionistët”.
Vendimi është pjesë e planit ekonomik të qeverisë për t’u ardhur në nevojë tre kategorive më të prekura nga kriza e koronavirusit, biznesit të vogël, familjeve në nevojë dhe pensionistëve.
Pjesë nga fjala e Edi Ramës:
“Ne po bëjmë maksimumin e mundësive tona. Po të ishte dëshira dhe jo mundësia do kisha bërë shumë më tepër. Punon në të zezë dhe do lekë se je i papunë. Por si bëhet kjo kur nuk do të denoncosh as se në cilin biznes ke punuar. Pse nuk i pyesni ata në Itali çfarë fuqie ka fuqia e 5 ekonomike e globit sot?
Ankoheni e shani pa pikën e vetëpërmbajtjes për pensionistët që nuk dinë të aplikojnë online. Pensionistët nuk aplikojnë dot sepse nuk do iu lejohet të dalin fare nga shtëpia. Ata që janë të vetmuar do t’i ndihmojmë ne.
Kur ra tërmeti e patë që ju dola për Zot. Nuk ia lashë Zotit asnjë nga detyrat e mia. Ju thashë të gjithë do iu ndihmojmë me pagën e luftës të tërë ata që janë në shtëpi se iu është mbyllur biznesi i vogël dhe javën e parë të prillit do të marrin lekët. Ju thashë se do iu dyfishojmë ndihmën ekonomike, dhe ata në javën e parë të prillit do të marrin lekët.
Ju thashë që në hyrje të prillit do indeksojmë pensionet do japim 20 mln euro plus për pensionistët. Si e keni hallin që rrini në shtëpi me një iPhone në dorë s’keni pensionistë dhe ankoheni për pensionistët”.
