Në QSUT u paraqitën ditën e djeshme rreth 56 studentë të Akademisë të Sigurisë, pas konsumimit të drekës. Ata janë paraqitur me simptomat e helmimit, me dhimbje barku dhe të vjella, 15 prej tyre janë shtruar në pavion pasi kishin simptoma më të rëndë.
Disa të tjerë kanë kaluar natën në ambientet e spitalit, për të marrë ndihmën mjekësore. Ndërkohë që këtë të mëngjes, 7 maj, në QSUT nuk ka asnjë student në spital, pasi ndodhin në gjendje të mirë shëndetësore.
Deri tani, për rastin, komisariati nr. në Tiranë ka arrestuar një prej teknologeve të kompanisë private, ka vënë në hetim një teknologe tjetër dhe ka shpallur në kërkim administratoren dhe pronaren Alma Tafani.
“Specialistët për Hetimin e Krimeve të Komisariatit të Policisë Nr. 1, në vijim të veprimeve hetimore të kryera në drejtimin e Prokurorisë së Tiranës, për këtë rast:
-arrestuan në flagrancë shtetasit K. B., 52 vjeç dhe K. P., 23 vjeçe, me detyra respektive kuzhinier dhe teknologe ushqimi në kompaninë e kontraktuar për të ofruar ushqim në Akademinë e Sigurisë;
-referuan materialet në Prokurori ku nisi procedimi në gjendje të lirë për shtetasen R. Ç., 35 vjeçe, me detyrë teknologe ushqimi në këtë kompani;
-shpallën në kërkim administratoren e kompanisë, shtetasen A. T., 52 vjeçe”,- njofton policia.
