Një ditë më parë, “iconstyle.al” bëri publik lajmin se dy laborantë dentarë, Besar Lalike dhe Eldian Cepeli, kishin nisur punën vullnetarisht për të krijuar një pjesë që modifikon ventilatorët mjekësorë duke rritur drastikisht kapacitetin e përballimit të një numri të lartë pacientësh të prekur nga COVID-19 me komplikacione të rënda.
Mbrëmjen e djeshme, shefi i Task-Forcës së emergjencës COVID-19, prof. dr. Arben Gjata dhe lajmin fantastik se eksperimenti i tyre kishte rezultuar me sukses.
“Iconstyle.al” ditën e sotme ka mësuar se Lalike dhe Cepeli, respektivisht nga Vlora dhe Kavaja, tashmë kanë nisur punën intensivisht për prodhimin e pjesëve të printuara nëpërmjet tekonlogjisë 3D. Ditën e sotme ata kanë bërë instalimin e pajisjeve në një laborator në Tiranë, për të qenë më afër QSUT-së dhe pritet të prodhojnë 300 tuba për modifikimin e ventilatorëve, që lejojnë trajtimin në të njëjtën kohë të minimalisht 2 pacientëve, sipas udhëzimeve të marra nga Bologna.
Sipas një studimi amerikan, kjo metodë ka rezultuar efektive, por ndonëse mbart rrezik në vetvete, në raste “jetë a vdekje” do të vihet patjetër në përdorim.
Sakaq, burime për “iconstyle.al” konfirmojnë gjithashtu se po prodhohen prototipe filtrash, që duke iu atashuar një maske zhytjeje “Decathlon”, arrijnë të mbajnë të sëmurin në jetë pa qenë nevoja e intubimit.
Një metodë e tillë është eksperimentuar dhe në Itali në zonën e Lombardisë, ku gjithashtu një kompani e printimeve 3D asistoi spitalin e qytezës Chiari me prodhimin e pjesëve të respiratorëve, duke ia dalë me sukses të bëjë modifikimet e nevojshme në pajisjet që mund të shpëtojnë jetë njerëzish.
Ishte dr. Alfred Aga ai që pikasi këtë shpikje gjeniale, duke udhëzuar më tej Laliken dhe Cepelen për të nisur punën për aplikimin e të njëjtës metodë dhe në Shqipëri.
Nisma e jashtëzakonshme e dy laborantëve dentarë shqiptarë gjithashtu mundëson dhe një tjetër lehtësi, pasi personeli që do të asistojë të sëmurët që kanë nevojë për respiratorë nuk duhet domosdoshmërisht të jetë i aftë në intubim, procedurë tepër e vështirë që kryhet nga reanimatorët dhe anestezistët.
Pra, kjo zgjidhje tejet eficente bën të mundur shtimin e personelit mjekësor, e po ashtu dhe rritjen e kapacitetit të trajtimit të pacientëve të prekur me COVID-19 me komplikacione të rënda.
Nisma e Besar Lalikes dhe Eldian Cepelit vjen në një kohë kur në vendin tonë po vihet re një rritje e vrullshme e të prekurve me koronavirus, ndërkohë që mungesa e respiratorëve dhe ventilatorëve është alarmante.
Në nisje të epidemisë u tha jozyrtarish se në Shqipëri ndodheshin vetëm 140 ventilatorë, ndërkohë që ditën e djeshme minsitrja Ogerta Manastirliu konfirmoi se është gati kontrata për blerjen e 54 respiratorëve dhe do të sigurohen gjithashtu dhe 100 të tjerë, shifër kjo sërish e pamjaftueshme.
“iconstyle.al” prej javësh ka ngritur problemin e mungesës së transparencës nga ana e Ministrisë së Shëndetësisë mbi kapacitetet e sistemit tonë shëndetësor për përballimin e kësaj pandemie, por institucionet tona vijojnë të jenë hermetike.
Aktualisht në vendin tona janë konfirmuar zyrtarisht 123 raste të prekur me COVID-19, ndërkohë që 5 persona kanë humbur jetën.
