104 të infektuar dhe 4 viktima, ky është bilanci nga COVID-19 në vendin tonë, teksa bëhet me dije se 49 prej tyre janë të shtruar në Spitalin Infektiv.
Një 61-vjeçar ka pësuar vdekje klinike dhe gjendja e tij shëndetësore është e vështirë.
Duke qenë se kjo javë është cilësuar si piku i pandemisë në vendin tonë, pritet që numri i të prekurve të rritet, e rrjedhimisht edhe nevoja për respiratorë.
Në një deklaratë për mediat, Ogerta Manastirliu është shprehur se do të blihen 54 respiratorë dhe kontrata është gati.
Kujtojmë se gjatë kësaj jave orari i lëvizjeve është 05:00-13:00. Gjatë këtyre orëve mund të bëni pazaret e nevojshme, por pa i thyer rregullat.
Kosovë
Numri i të infektuarve në Kosovë është dyfishuar papritur, sipas një njoftimi nga Instituti Kombëtar i Shëndetësisë Publike.
Sipas njoftimit zyrtar, janë konfirmuar 26 raste të reja në vend, duke e çuar në 61 numrin e personave të prekur nga koronavirusi.
Të gjithë personat e infektuar rezultuan të kishin pasur kontakte me persona të infektuar.
Maqedonia e Veriut
Ndërsa numri i të infektuarve në Maqedoninë e Veriut ka shkuar në 133 frika nga pandemia dhe rastet e thyerjes së rregullave nga ana e qytetarëve ka shtyrë qeverinë të vendosë gjoba të majme si dhe të kufizojë oraret e lëvizjes. Dy ditë më parë në Maqedoninë e Veriut u regjistrua edhe viktima e parë.
Gjermania
Gjermania renditet e 5 në nivel botëror për numrin e të prekurve dhe viktimave nga koronavirusi. Ajo numëron 27,546 të infektuar dhe 115 viktima, një numër i vogël në raport me popullsinë apo krahasuar dhe me vendet e tjera. Ditën e djeshme dolën edhe rezultatet e analizave të Angela Merkle, e cila pati kontakt me një mjek të infektuar dhe për këtë shkak u karantinua. Në testin e parë ajo rezultoi negative, megjithatë do të kryejë edhe të tjerë në vazhdim.
Italia
Në Itali situata vazhdon edhe të përkeqësohet!
Vendi fqinj ka regjistruar 602 vdekje në 24 orët e fundit duke e çuar në total 6,078 numrin e tyre.
Mësohet se numri i mjekëve që kanë humbur jetën në krye të detyrës në Itali ka shkuar në 24. Në total, numri i rasteve të infektuara me koronavirus në Itali ka shkuar në 63,928, shifër e cila vazhdon të rritet dita ditës.
Spanja
Pas Italisë, Spanja është shteti që po përballet me vështirësinë më të madhe për shkak të koronavirusit. Numri i të prekurve ka shkuar në 35,136 persona dhe fatkeqësisht është rritur ndjeshëm edhe numri i viktimave. Në 24 orët e fundit mësohet se kanë ndërruar jetë më shumë se 200 persona dhe në total bilanci është tragjik me 2, 311 viktima. Në rrjetet sociale po qarkullon edhe një video ku tregon për situatën e vështitë në spitale. Për shkak të situatës nuk ka shtretër dhe të infektuarit shtrihen përtokë.
SHBA
Në SHBA numri i të infektuarve nga koronavirusi ka shkuar në 46, 145 dhe kanë ndërruar jetë 582 persona. Vetëm në orët e fundit janë konfirmuar 29 vdekje të reja.
Kujtojmë se presidenti Donald Trump vazhdon të marrë masa lehtësuese për bizneset dhe familjet.
Kina
Në Kinë ka shpresë!
Në vendin ku u përhap koronavirusi janë shëruar plot 73,156 pacientë. Në orët e fundit kanë ndërruar jetë vetëm 7 persona dhe raste të reja me koronavirus janë shënuar 78. Në total në Kinë u infektuan 81,171 persona dhe numri i viktimave ka shkuar në 3277.
