Teksa numri total i të infektuarve nga koronavirusi në vendin tonë ka arritur në 76 persona dhe ai i viktimave 2, qeveria ka marrë masa drastike të forta për të izoluar të gjithë qytetarët.
Prej orës 13:00 të ditës së djeshme është ndaluar qarkullimi për të gjithë qytetarët dhe automjetet.
Sipas njoftimit të bërë së fundmi nga policia, nga ky rregull bëjnë përjashtim mjetet e transportit të mallrave dhe produkteve ushqimore vetëm për të furnizuar marketet dhe minimarketet, Policia e Shtetit, Forcat e Armatosura, SHPSF-të, Policia e Burgjeve, njësitë kritike të shërbimeve shtetërore dhe atyre të kompanive mediatike, si dhe ata që janë të përfshirë në listat e bashkive për shërbime të ndryshme dhe shërbimet në banesë.
Ky izolim do të zgjasë deri në orën 05:00 të datës 23.03.2020.
31 të infektuar me koronavirus në Kosovë
Pas dy rasteve nga Gjilani, një rast tjetër ka dalë pozitiv në testet për COVID–19, në Kosovë. Mësohet se i infektuari me koronavirus është nga fshati Senik i Malishevës, mashkull i moshës 31-vjeçare.
Nga data 08.02.2020 deri me 21.03.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 567 mostra të dyshimta në virusin SARS-CoV-2 dhe prej tyre, gjithsej 31 raste kanë rezultuar pozitive.
Maqedonia e Veriut forcon masat kundër përhapjes së virusit
Ndërsa numri i të infektuarve në Maqedoninë e Veriut ka shkuar në 85, frika nga pandemia dhe rastet e thyerjes së rregullave nga ana e qytetarëve ka shtyrë qeverinë të vendosë gjoba të ‘majme’ si dhe të kufizojë oraret e lëvizjes së njerëzve për të sensibilizuar qytetarët e saj.
Sipas raportimeve të mediave vendase, qytetarëve iu janë lënë në dispozicion vetëm 9 orë për tu kthyer në shtëpitë e tyre, nga ora 21:00 deri në orën 06:00 të mëngjesit. Kufizimi i lëvizjes së qytetarëve do të hyjë në fuqi ditën e sotme.
Italia arrin kulmin me numrin e viktimave në 24 orë, gati 800
Italia urdhëroi që të gjitha bizneset më thelbësore të mbyllen deri më 3 prill, duke shtrënguar masat kundër koronavirusit, pasi gati 800 njerëz vdiqën nga COVID-19, sëmundja e shkaktuar nga virusi, të shtunën.
“Vetëm aktivitetet e prodhimit të cilat konsiderohen jetike për prodhimin kombëtar do të lejohen,” tha kryeministri Giuseppe Conte në një video të postuar në Facebook, por nuk hyri në detaje mbi propozimet që do të hynin në fuqi përmes dekretit të urgjencës të dielën.
Në Itali u regjistruan 793 vdekje të shtunën. Franca dhe Spanja dhe Gjermania gjithashtu raportuan rritje të mëdha të shifrave të të infektuarve dhe vdekjeve.
Gati 13,000 njerëz në mbarë botën kanë vdekur nga sëmundja, sipas të dhënave të mbledhura nga Universiteti Johns Hopkins në SHBA. Më shumë se 304.500 njerëz janë diagnostikuar me virus, ndërsa rreth 92,000 janë shëruar.
Rusia do të dërgojë ndihmë në Itali
Presidenti rus Vladimir Putin është ofruar të ndihmojë Italinë që të frenojë përhapjen e koronavirusit.
Në një telefonatë me kryeministrin italian Giuseppe Conte, Putini ofroi mbështetjen e tij në formën e automjeteve të dezinfektimit dhe specialistëve për të ndihmuar rajonet italiane të goditura më keq, sipas Kremlin.
Ministria ruse e Mbrojtjes tha që aeroplanët e transportit ushtarak do të dërgonin tetë brigada të lëvizshme të mjekëve ushtarakë, automjete speciale dezinfektimi dhe pajisje të tjera mjekësore në Itali duke filluar nga e diela.
12 vdekje të reja nga koronavirusi në Turqi
Turqia ka konfirmuar 12 vdekje të reja nga koronavirusi duke e çuar numrin e përgjithshëm të vdekjeve në 21. Në llogarinë e tij në Twitter, ministri turk i Shëndetësisë, Fahrettin Koca, shkroi se të vdekurit nga koronavirusi janë të moshuar. Koca njoftoi se në 24 orët e fundit janë kryer 2.953 teste tek personat që dyshohet se janë infektuar me koronavirus dhe se 277 prej tyre janë testuar pozitiv. Me këto, shtoi ai, numri i përgjithshëm i të infektuar në vend rritet në 947.
“Le t’i paralajmërojmë njerëzit tanë të moshuar. Ata duhet të respektojnë kufizimet e largimit nga shtëpia”, shkroi Koca. Koronavirusi, i cili për herë të parë u shfaq në Wuhan të Kinës dhjetorin e kaluar, është përhapur në të paktën 167 vende dhe rajone në mbarë botën.
Zëvendëspresidenti në SHBA rezultoi negativ për koronavirusin
Zyra e Nënkryetarit të SHBA Mike Pence thotë se ai dhe gruaja e tij kanë rezultuar negativë për koronavirusin.
Dyshja e bëri testin pasi një prej stafit të Pence u diagnostikua me virusin.
Skepticizmi rritet pasi Koreja e Veriut s’ka asnjë rast zyrtar me COVID-19
Vëzhguesit e Koresë së Veriut po shprehin skepticizëm – dhe disa alarm – në lidhje me pretendimin e qeverisë se vendi është i paprekur nga koronavirusi.
Burimet i kanë njoftuar ata për një numër rastesh, dhe shqetësohen se nëse fillon të përhapet brenda komunitetit më të gjerë, pasojat do të ishin shkatërruese.
Koreja e Jugut raporton 98 raste të reja të koronavirusit
Qendrat Koreane për Kontrollin dhe Parandalimin e Sëmundjeve raportuan 98 raste të reja të koronavirusit, duke e çuar numrin e përgjithshëm kombëtar në 8,897.
Wuhan raporton ditën e katërt pa raste të reja
Wuhan, ku koronavirusi u shfaq për herë të parë në fund të vitit të kaluar, tha se nuk kishte raste të reja të koronavirusit të shtunën, duke shënuar ditën e katërt pa një infeksion të ri.
Kina raportoi 46 raste të reja të konfirmuara, të gjitha, përveç njërit prej tyre, të importuara nga jashtë.
U raportua gjithashtu se gjashtë njerëz të tjerë vdiqën nga COVID-19.
/Iconstyle.al
