CEO i Facebook, Mark Zuckerberg ka njoftuar së fundmi se kompania e tij do të ngrejë një qendër virtuale të informacionit për koronavirusin që do të shfaqet në krye të murit në Facebook, duke nxitur përdoruesit që të ndjekin udhëzimet për distancimin social.
“Konsensusi i përgjithshëm është që roli më i madh që ne mund të kemi është në inkurajimin e njerëzve që të marrin seriozisht distancimin social.”-është shprehur Zuckerberg.
Ai shpjegoi më tej se qendra e informimit është ngritur në bashkëpunim me partnerët nga sektori i shëndetit dhe do të shfaqet për përdoruesit e SHBA-së dhe Europës brenda 24 orëve. Ndërsa për vendet e tjera pritet të shfaqet në ditët në vazhdim.
Sipas tij, qëllimi kryesor është që informacionet e organizatave si OBSH të jenë në sytë e kujtdo që përdor Facebook.
Gjithashtu, Zuckerberg deklaroi se kompania e tij do të ofrojë falas për qeverinë dhe organizatat e shërbimeve të emergjencës platformën “Workplace”, e ideuar për komunikimin virtual brenda kompanive të mëdha.
Kjo platformë që deri më tani ofron tre paketa (Essential që është falas, Advanced që është 4 $ në muaj për përdorues dhe Enterprise që është 8 $ në muaj për përdorues) i përngjan Facebook-ut të zakonshëm, por është i mbyllur vetëm për punonjësit e regjistruar të kompanisë dhe ofron të gjitha lehtësirat për të punuar në distancë.
“Ne duam të sigurohemi se po bëjmë gjithçka që mundemi për të mbështetur shëndetin publik. Disa nga punët që këta njerëz po bëjnë jane heroike dhe personalisht jam shumë mirënjohës!”-është shprehur Zuckerberg.
Ai ka rrëfyer se kjo pandemi ka rritur masivisht përdorimin e platformave që ai zotëron, veçanërisht telefonatat në Whatsapp dhe Facebook Messenger, ndërkohë që punonjësit e tij po sigurohen që infrastruktura e Facebook mund të përballojë me sukses rritjen e mëtejshme të numrit të përdoruesëve.
Por për t’u rikthyer tek “Workplace”, zgjidhja që Zuckerberg i ka ofruar qeverisë së tij duket një strategji brilante në mënyrë që institucionet shtetërore të vijojnë punën e tyre edhe në kushte të tilla të izolimit.
Duke qenë se në situatën ku ndodhemi shumë prej institucioneve kanë ndaluar aktivitetin dhe nuk dihet se kur mund t’i rikthehen normalitetit, platforma “Workplace” apo të tjera të ngjashme me të mund të mundësojnë vijimin normalisht të punës, ndërkohë që punonjësit janë në vetëizolim.
Sidoqoftë, për Facebook jo të gjithë treguesit kanë qenë pozitivë. Aksionet e kompanisë në bursë kanë rënë me 33%, si pasojë e rënieje të përgjithshme në tregjet botërore.
Gjithësesi, platforma gjigante sociale këtë javë ka deklaruar se do të vërë në jetë një program 100 milionë dollarësh për të mbështetur bizneset e vogla të prekura nga epidemia e koronavirusit.
Gjithashtu do të ketë dhe një bonus prej 1 mijë dollarësh për cilin prej 45 mijë punonjësve (me kohë të plotë) të kompanisë.
Zuckerberg ka nisur t’i këshillojë punonjësit që të punojnë nga shtëpitë që në ditët e para të marsit, pa u shpallur ende pandemia, si dhe anuloi të gjitha konferencat. Gjithashtu Facebook ndaloi reklamimin online të maskave mbrojtëse.
