Një lajm i mirë na vjen nga babai i pacientit zero në Shqipëri, i prekur nga Koronavirusi.
Ai ka reaguar mirë ndaj kurës dhe është drejt shërimit. Kryeministri Edi Rama ka njoftuar se babai i pacientit zero që është shtruar te Infektivi, ka bërë testin e parë që i ka dalë negativ ndaj Koronavirusit.
Aktualisht mjekët janë në pritje të testit të dytë që del pas 48 orësh që rezultati final i shërimit të tij të konfirmohet plotësisht.
“Një lajm i mirë! Kontakti i parë i pacientit zero që kurohet në spitalin infektiv doli negativ në testin e parë
Nëse edhe në testin e dytë pas 48 orësh ky rezultat do të konfirmohet, atëherë do të kemi të shëruarin e parë
Të presim dhe të lutemi që zoti t’u japë forcë të sëmurëve dhe heronjve me bluza të bardha, në vijën e zjarrit me armikun. Durim, besim dhe durim, durim, durim!’, shkruan Rama.
Ky është një lajm që jep shpresë në një kohë që numri i të prekurve deri tani ka shkuar në 55, ndërsa në Durrës është regjistruar edhe vdekja e parë.
Tirana mban numrin më të madh të rasteve, 38 persona të infektuar. Pas saj vjen Fieri me 6 persona dhe Durrësi në vendin e tretë me 5 raste të konfirmuara.
Në Spitalin e Infektivit në QSUT janë shtruar 25 raste, 3 prej të cilëve janë nën kujdes intensiv.
/Iconstyle.al
