Ai ka shumë emra! Është quajtur “Princi i errësirës”, “Engjëlli i rënë”, “Mbreti i Ferrit”, “Lucifer”, por të gjithë e njohin më shumë si Djalli!
Ne do t’i referohemi atij si Lucifer në artikullin e sotëm, ku do të flasim për një nga serialet më të shikuar në mbarë botën, që mban emrin e vetë personazhit “Lucifer” dhe është transmetuar për herë të parë në 2016-n.
Kush është Lucifer
Në krishtërim, emri Lucifer i referohej një engjëlli që u rebelua kundër sundimit të Zotit në Parajsë. Ky engjëll, ishte dikur “bartësi i dritës” (latinisht: Lux-dritë dhe ferre-bartës) por u dënua nga Zoti pas rebelimit dhe përfundoi duke shërbyer në Ferr, ku manipulonte demonët e ndryshëm, torturonte shpirtrat e këqij dhe drejtonte luftën kundër Parajsës.
Një Djall në LA!
Sidoqoftë, në një moment gjatë sundimit të tij, ai u mërzit me ekzistencën e vet, nuk i pëlqente ideja që shumë njerëz e quanin veten djall dhe fajësonin Luciferin për veprimet e këqija që bënin. I lodhur nga veprimet e këqija të njerëzve me të cilat nuk kishte fare lidhje, pasi supozohej thjesht t’i ndëshkonte ata pasi përfundonin në Ferr, Luciferi vendos të braktisë Ferrin dhe gjejeni pak se ku vendos të jetojë nga të gjitha vendet e botës që mund të zgjidhte: Në Los Angeles!
Në serialin që transmetohet në Netflix, Lucifer Morningstar (Tom Ellis) drejton klubin e tij të natës të quajtur “Lux” i ndihmuar nga demoni i tij i preferuar Mazikeen (sigurisht që është femër). Luciferi është një personazh vdekjeprurës, tmerrësisht seksi, i zgjuar, nuk e merr fare parasysh jetën e njeriut përveç se kur mund ta përdorë në avantazhin e tij; dhe hakmarrës.
Lucifer përshkruhet si më i mençuri, më i bukuri dhe më i fuqishmi nga të gjithë engjëjt në parajsë, dhe i ruan këto tipare edhe pas rënies së tij. Ai gjithashtu refuzon me ngulm të gënjejë (gjatë gjithë kohës ju thotë njerëzve që është djalli, edhe pse nuk e beson njeri) insiston të paguajë borxhet dhe e mban gjithmonë fjalën e tij.
Çfarë ndodh kur Djalli bie në dashuri?
Pas një takimi me një efektive bjonde, me sy bojëqielli dhe shumë tërheqëse, Chloe (Lauren German), së cilës nuk ia zbulon dot dëshirat e fshehta (një nga cilësitë e Lucifer) Lucifer bëhet këshilltar i jashtëm i policisë, për të zbardhur vrasjet dhe zbuluar se çfarë duan në të vërtetë njerëzit e këqij!
Luciferi flet hapur me Chloe-n dhe vazhdimisht i zbulon asaj identitetin e tij të vërtetë si Djalli. Chloe sigurisht që nuk i beson asnjë fjalë… Por Lucifer e merr shumë seriozisht marrëdhënien me të ku kupton se prania e saj e dobëson atë, e zhvesh nga fuqia e tij si i pavdekshëm, për një arsye misterioze dhe të panjohur.
Luciferit i pëlqen shumë Chloe, dhe kjo edhe sepse ajo vazhdon ta refuzojë, gjë që nuk e bëjnë dot femrat e tjera që bien kokë e këmbë në dashuri me të.
Chloe më në fund ndërgjegjësohet për ndjenjat e saj të vërteta për Luciferin, kur ka arsye për të qenë vërtet xheloze.
Tom Ellis ta vjedh zemrën dhe nuk ta jep më!
Seriali është dramë por dhe komedi! Ka disa batuta të papara dhe Luciferi për nga natyra e tij, është i papërballueshëm. Ai ka aftësinë t’i detyrojë njerëzit të zbulojnë dëshirat e tyre më të thella, thjesht duke i pyetur: Çfarë dëshiron më shumë?
Ka një theks britanik që e bën atë një nga personazhet më karizmatikë dhe të hijshëm në ekranet tona televizive. Imagjinoni një playboy seksi, që vishet vetëm me kostum, është pronar i një lokali nate dhe nget një automjet “Chevrolet Corvette” të vitit 1962!
Ndjeshmëria e Luciferit, problemet që ka me të atin, Zotin, dhe sjelljet e tij do t’ju bëjnë ta dashuroni personazhin pasi Ellis e portretizon atë në mënyrë të shkëlqyeshme.
“Lucifer”-in e shpëtoi Instagrami
Lucifer transmetohej në kanalin “Fox” por u anulua në maj të vitit 2018, duke shkaktuar një revoltë mes fansave. Falë këtyre të fundit, lobimit masiv të aktorëve në rrjetet sociale, u mblodhën shumë peticione dhe një fushatë online #SaveLucifer, bëri që seriali të rikthehej për një sezon të katërt në Netflix.
Luciferi i njeh femrat shqiptare, ose kujton se i njeh!
Ka një moment gjatë sezonit të parë, pjesa e 11, kur Lucifer përmend gratë shqiptare! Papritur, Chloe zgjohet e zhveshur në krevatin e tij dhe s’mban mend asgjë se çfarë ka ndodhur!
Të kenë bërë seks vallë? Kushedi! Vetëm një gjë e dimë me siguri dhe këtë na e thotë Lucifer! Chloe gërhet, si “gratë shqiptare që punojnë në arë”. UPS!
Femrat në këtë serial janë të forta!
Edhe pse Luciferi është fokusi kryesor i serialit, ka plot karaktere femrash të forta, të ashpra dhe intelektuale. Duke filluar që nga detektivja Chole Decker e deri tek demoni Maze, këto gra janë më se të forta sa të kujdesen për veten e tyre.
Dhe sigurisht, nuk duhet të harrojmë Dr. Linda Martin, terapisten e Luciferit (po, Luciferi shkon te psikologia, se imagjino të kesh Zotin baba dhe ainuk të do). Linda fiton një vend të rëndësishëm në zemrën e Luciferit si mikesha e tij më e mirë.
Komploti!
Ashtu si çdo serial, ka disa komplote dhe histori që evoluojnë ndërsa personazhet zhvillohen çdo sezon, por Lucifer është gjithashtu një serial policor. Çdo episod ka një krim, vrasje apo mister të ndryshëm që përfundon me zgjidhjen e tij ose jo, deri në fund të episodit.
E teksa Lucifer përpiqet t’i zgjidhë ato, të tjera probleme do të dalin në sipërfaqe! Sa më gjatë që Lucifer qëndron në Tokë, aq më shumë ai rrezikon të sjellë “Ferrin në Tokë”, duke rrezikuar të gjithë ata që do!
Super kast!
Gjatë serialit shfaqen shumë personazhe të tjera nga Parajsa, si Amenadiel (vëllai i madh i Luciferit) apo nga Ferri, nëna e Luciferit (gruaja e para e Zotit), që hyn në trupin e një avokateje seksi (Tricia Helfer).
Ka edhe personazhe që kanë mbetur midis Ferrit dhe Parajsës, si Cain, që portretizohet nga aktori i famshëm i serialit “Superman”, Tom Welling që kërkon t’i marrë Chloe-n Luciferit!
Aktualisht po prodhohet sezoni i pestë i Lucifer që do të publikohet diku nga viti i ardhshëm. Ndërkohë, ju jeni në kohë për të parë 4 sezonet e para që do t’ju argëtojnë pafund!
/Iconstyle.al
