Reperi i njohur Cllevio është rikthyer në vëmendjen e publikut pas lirimit të tij, duke qenë i ftuar në emisionin e moderatorit Meriton Mjekiqi, ku ka folur hapur për jetën e tij të re, muzikën dhe raportet e tensionuara me disa figura të skenës së repit shqiptar.
Gjatë intervistës, Cllevio ndau detaje për rikthimin e tij në aktivitetin artistik, duke komentuar edhe një performancë të fundit që u mbyll me një këngë të Unikkatilit. I pyetur për këtë zgjedhje, ai u shpreh me një mesazh emocional për besnikërinë: “Njerëzve që i dua apo i kam dashur, mundohem t’u tregoj që jam këtu prapë për ta, edhe nëse ata nuk kanë qenë aty për mua”.
Më tej, reperi foli edhe për marrëdhënien e tij me Unikkatilin, duke treguar se kanë pasur një raport të drejtpërdrejtë dhe se fillimisht ishte pikërisht ai që e afroi te grupi. Megjithatë, Cllevio tha se komunikimi mes tyre është zbehur me kohën, duke shtuar se “ai ka hallet e veta”, por nuk la pa shprehur edhe pakënaqësi.
Sipas tij, mbështetja e munguar ka qenë një pikë e ndjeshme: “Ai duhej të ishte më përkrahës për mua sepse unë ia kam ngritur kokën. Por, një gango ka ardhur nga Nju Jorku dhe këta nuk e mbajtën dot,” u shpreh ai, duke bërë krahasimin: “Po më përkrah Geti e s’po më përkrah Viktori”.
Në fund të bisedës, Cllevio theksoi pozicionin e tij në skenë dhe refuzimin për të qenë nën hijen e dikujt tjetër, duke mbyllur me një deklaratë të fortë: “Unë nuk e dua refrenin. Nuk jam gango që të varem te komandanti. Unë nuk jam ushtar, unë jam gjeneral!”.
