Shyhrete Tahiri-Sylejmani quhet viktima e dytë e dhunës seksuale gjatë luftës në Kosovë që ka folur hapur në publik për tragjedinë e saj dhe ka kërkuar drejtësi.
E mbijetuara e dhunës seksuale nga Gjilani, ka dorëzuar sot kallëzim penal në Prokurorinë Speciale të Kosovës, për të kërkuar drejtësi për atë që i ka ndodhur.
“Sot jam këtu të ndaj me ju dhembjen që kam në shpirt. Përfaqësoj të gjitha nënat, vëllezërit dhe bijat që ndjejnë atë dhembje që kanë. S’është e lehtë. Jam këtu të kërkoj drejtësi”, u shpreh ajo, raporton “KP”.
Shyhrete Tahiri-Sylejmani bëhet viktima e dytë që kërkon publikisht të dënohen dhunuesit e saj.
E mbijetuara e dhunës seksuale nga forcat serbe dhe aktivistja Vasfije Krasniqi Goodman, është një nga gratë e para në Kosovë që ka ndarë publikisht përvojat e saj të dhunës seksuale gjatë luftës në Kosovë.
Ajo madje dëshmoi në Kongresin amerikan dhe i bëri thirrje komitetit për të adresuar mosndëshkimin e krimeve të luftës dhe abuzimeve të të drejtave të njeriut që janë kryer në Kosovë.
