“Tirana po ndryshon me shpejtësinë e dritës!” Këto janë fjalët që hapin një prej edicioneve speciale të “Mediaset”, kushtuar pikërisht vendit tonë dhe sipërmarrjeve të reja në fushën e teknologjisë.
Në edicionin special që tregon se sa shumë ka përparuar Tirana përgjatë viteve të fundit duke përmendur pastërtinë, aktivitetet e shumta sportive e kulturore e modernizimin në tërësi, ka qenë pikërisht aplikacioni inovator “Welcome Albania” ai që ka tërhequr vëmendjen e gjigantit mediatik italian.
I cilësuar si një frut i dëshirës së madhe të Shqipërisë për progres dhe risi, aplikacioni që të lejon të eksplorosh Shqipërinë nga pëllëmba e dorës vetëm falë një aparati celular apo tablet, ka zgjuar kuriozitet jo vetëm tek ata që synojnë ta vizitojnë Shqipërinë si turistë, por edhe si klientë të bizneseve të shumta të suksesshme që janë pjesë e “Welcome Albania”, apo si sipërmarrës në vendin tonë.
Dhe kjo është pikërisht ajo që ka kuriozuar produksionin e “Millionaire.it”. Duke qenë platforma e parë në Shqipëri që ka prezantuar në vendin tonë shërbimin Tourmake, një teknologji tërësisht bashkëkohore që të lejon të vizitosh një hapësirë virtualisht me shikim në 360 gradë, kjo risi teknologjike është përqafuar me shpejtësi jo vetëm nga tregu shqiptar, por edhe ai i huaj.
Falë cilësisë së standartit superior, por edhe çmimeve tepër të favorshme, “Welcome Albania” është bërë shtëpia virtuale e plot 250 bizneseve dhe deri në muajin shtator, kjo shifër pritet të jetë rritur në 300, çka dëshmon një interes të jashtëzakonshëm që prek jo vetëm fushën e turizmit siç pritej fillimisht, por ekonominë shqiptare në tërësi.
Së fundmi, ekspertët e “Welcome Albania” kanë zbuluar dhe imazhin e ri që aplikacioni do të ketë së shpejti, ku atraksionet turistike dhe bizneset e shumta do të paraqiten në një mënyrë interaktive që e bën edhe më praktik eksplorimin.
Në vetëm një muaj, më shumë se 5 milionë vizitorë virtualë eksplorojnë nëpërmjet “Welcome Albania” Shqipërinë dhe të gjitha bizneset pjesë e aplikacionit duke filluar nga hotelet, restorantet e deri tek klinikat mjekësore dhe suksesi i këtij aplikacioni në vetvete, me jehonën në mediat ndërkombëtare, është përkthyer dhe një një promovim mëse pozitiv për Shqipërinë në tërësi.
