Një ngjarje e rëndë tronditi qytetin e Beratit, ku një 16-vjeçare helmoi veten pasi kërcënohej nga një moshatar me publikimin e një videoje në internet.
Vajza shkoi në gjendje kome në spital, në orët e para të mëngjesit të dy ditëve më parë, dhe ndërroi jetë shumë pak orë më pas.
Prindërit nuk kishin kuptuar asgjë nga tronditja që po kalonte vajza e tyre dhe as shoqet e shokët e klasës, edhe pse një ditë para aktit ekstrem ajo u kishte treguar se ndihej e shqetësuar nga shoku i shkollës.
Gjithçka u kuptua nga telefoni i vajzës pasi ajo ndërroi jetë. Aty kishte mesazhe të shumta nga 16-vjeçari, i cili u arrestua menjëherë nga policia.
Nxënës të shkollës profesionale në Berat, thonë se Adela ishte një vajzë mjaft e heshtur, ama në fytyrën e saj thuajse engjëllore nuk mungonte buzëqeshja dhe reflektimi në sy se jeta për të ishte me ngjyra.
“E njihnim si vajzë shkolle, nuk e dinim që kishte probleme. Ai ishte një djalë në shkollë, nuk e njihja e kam pasur edhe në 9-vjecare. Adela ishte një vajzë e lumtur në pamjen e jashtme, nuk krijonte asnjëherë probleme. E shikonte botën me ngjyra. Nuk shfaqte asnjë problem apo shqetësim nga pamja e jashtme. Është rasti i dytë që ndodh, por nuk është se kemi pasur të tilla probleme”, shprehet një nxënëse e shkollës.
Vetë djali ishte problematik. Me mungesa në orët mësimore dhe i shoqëruar me grupe të rinjsh që shpesh të japin drejtim në rrugën e gabuar.
“Viti i dytë. Disa njerëz thonë për diçka tjetër, disa të tjerë për diçka tjetër. Djali i mirë nuk ishte, mesa rrija unë. Nuk e di…Ishte e papritur kur e morëm vesh, na erdhi keq. Djali nuk vinte në shkollë. Kur vajti në vit të parë njohu shoqëri të gabuar. Adela ishte vajzë shumë e urtë. Nuk e kishim menduar të vriste veten”, tregon një prej nxënëseve të shkollës për Report Tv.
