Ditën e djeshme u njoftua se, një person i katërt ishte në kërkim për atentatin ndaj 26-vjeçarit Jurgen Kurti.
Policia zbuloi sot identitetin e personit, i cili dyshohet se qëlloi me armë të riun mbrëmjen e 18 marsit dhe ai është Klodian Bane.
Në prangat e policisë ditën e djeshme ranë Elsi Leventi, 21 vjeç, lindur në Athinë dhe banues në Tiranë, Alesio Berberi, 33 vjeç, lindur në Patos, Olsi Qalliaj, 22 vjeç, lindur në Fier dhe banues në Patos.
Sipas raportimeve, tre të arrestuarit nuk i kanë pranuar akuzat, ndërsa ndalimi i tyre u bë pas këqyrjes së 50 kamerave të sigurisë që ndodheshin në zonën e Tiranës së Re.
Burime për “Report Tv” thanë dje se, tre të arrestuarit janë vrasës me pagesë dhe se ekzekutimin e Kurtit e kanë bërë me porosi, për llogari të një personi tjetër.
Të njëjtat burime thanë se, autorët e kanë ndjekur për më shumë se dy javë Jurgen Kurtin, ndërsa dyshohet që vrasësit me pagesë të kenë marrë 30 mijë euro për ekzekutimin e Kurtit.
21-vjeçari Elsi Levendi mësohet se ka ndjekur viktimën derisa ka mbërritur në lagje, ndërsa më pas njoftoi ekzekutorët për vendndodhjen e Jurgenit. Pas krimit të katërt janë dalluar nga kamerat e sigurisë duke u takuar bashkë.
Mësohet se arma e krimit dhe makina “Benz” janë gjetur në banesën e Alesio Berberit.
