Aktori i njohur turk Necati Şaşmaz i cili njihet gjerësisht nga publiku shqiptar si Polat Alemdar, nga roli i tij në serialin “Lugina e Ujqërve”, i ka kërkuar ish-bashkëshortes milionat si dëmshpërblim.
Ai tashmë i ka dhënë fund martesës së tij 7-vjeçare me bashkëshorten Nagehan Kasikci. “CNN Turk” raporton se shkaku i ndarjes nuk është bërë ende i ditur, por Polati e ka akuzuar atë se “ka lëkundur themelet e bashkimit të tyre martesor”.
Pas ndarjes aktori ka kërkuar 10 milionë lira turke kompensim nga bashkëshortja dhe ka bërë kërkesë për kujdestarinë e fëmijëve.
Avokati i aktorit tha për mediat se klienti i tij kërkon 5 milionë lira për dëme materiale dhe 5 milionë të tjera për dëme jomateriale.
Ai ka kërkuar gjithashtu nga gjykata që bashkëshortes t’i ndalohet udhëtimi jashtë vendit pasi ka frikë se ajo merr fëmijët dhe largohet.
